Umunyamabanga nshingwabikorwa w’Umurenge wa Gatare, Ndagijimana Gustave yafashe icyemezo cyo gushyira abaturage bo mu Kagari ka Agatare muri Guma mu Rugo, Ubuyobozi bw’Akarere bubitesha agaciro.
Mu gihe byari bisanzwe bimenyerewe ko ingamba zijyanye n’icyorezo cya Covid-19 zishyirwaho n’Inama y’Abaminisitiri cyangwa Minisiteri y’Ubutegetsi bw’Igihugu, kuri uyu wa 3/8/2021, Umunyamabanga Nshingwabikorwa w’Umurenge wa Gatare yashyizweho ingamba zateshejwe agaciro zidashyizwe mu bikorwa.
Muri izo ngamba zashyizweho na Ndagijimana Gustave, harimo gushyira abatuye mu Kagari k’Agatare muri ‘Guma mu Rugo’( avuga ko hari ubwandu bwinshi bwa covid-19), gufunga sacco, gufunga amasoko n’amaduka n’ibindi bikorwa bitandukanye, akaba yari yategetse ko iki cyemezo kigomba guhita gishyirwa mu bikorwa.
Nyuma y’amasaha macye uyu muyobozi afashe ibi byemezo, Ubuyobozi bw’Akarere ka Nyamagabe bwabitesheje agaciro.
Ubutumwa bwashyizwe ku rukuta rwa twitter rw’aka karere buragira buti : “Ubuyobozi bw’Akarere ka Nyamagabe burasaba abantu bose kudaha agaciro iri tangazo kuko uwafashe umwanzuro nta bubasha abifitiye. Abaturage b’Akagali ka Gatare barakomeza gukora ibikorwa byabo bya buri munsi bubahiriza amabwiriza asanzwe yo kwirinda icyorezo cya COVID-19.”
Minisiteri y’Ubuzima yatangaje ko ku wa Mbere tariki 02 Kanama 2021 mu Rwanda habonetse abanduye Covid-19 bashya 720 bakaba babonetse mu bipimo 6,429. Abantu 10 bitabye Imana kubera icyo cyorezo, bituma umubare w’abamaze gupfa bose uba 831. Mu Karere ka Nyamagabe hari ahagaragaye abantu 38 bashya banduye Covid-19. 
Iriba.news@gmail.com
