Umukuru w’ishami ry’umuryango w’abibumbye ryita ku buzima (OMS/WHO), Dr Tedros Ghebreyesus, yinubiye ukuntu adashobora koherereza amafaranga benewabo bo mu karere ka Tigray mu majyaruguru ya Ethiopia barimo kwicwa n’inzara.
Tedros, wo mu bwoko bw’aba Tigray, yavuze ko ako karere kamaze imyaka ibiri gafunze kuva intambara yatangira, kandi ko abahatuye bababaye.
Ati: “Mfiteyo benewacu [abo dufitanye isano] benshi.
“Ndashaka kuboherereza amafaranga. Sinshobora kuboherereza amafaranga. Barimo kwicwa n’inzara, ndabizi, [ariko] sinshobora kubafasha”.
Avuga ku kuba adashobora kubavugisha, yagize ati: “Sinzi n’uwapfuye cyangwa uriho”.
Yabivuze ku wa kane mu kiganiro n’abanyamakuru i Genève ku cyicaro gikuru cya OMS.
Iyi ntambara, yatangiye mu kwezi kwa cumi na kumwe mu 2020, imaze kwicirwamo abasivile babarirwa mu bihumbi za mirongo.
Ababarirwa muri za miliyoni ubu bacyeneye imfashanyo y’ibiribwa.
Kuva intambara yatangira, akarere ka Tigray nta serivisi z’ibanze gafite, nk’umuriro w’amashanyarazi (umuyagankuba mu Kirundi), uburyo bw’itumanaho, n’amabanki ntagikora.
Muri iki cyumweru, imirwano yongeye kubura, nyuma y’amezi yari ashize hari agahenge ko kugira ngo imfashanyo ishobore gutangwa.
Ako gahenge kari kemeranyijweho mu kwezi kwa gatatu uyu mwaka, hagati y’inyeshyamba zo muri Tigray na leta ya Ethiopia.
@BBC
