Repuburika ya Demukarasi ya Congo, yirukanye umunyamakuru Sonia Rolley, ukorera Ibiro Ntaramakuru Reuters, nyuma yo kumwima uruhushya rwo gukorera muri icyo gihugu.
Mu kwezi kwa Cyenda, Sonia Rolley yandikiye Leta ya Congo, ayisaba uburenganzira bwo gukorera muri icyo gihugu ahagarariye Reuters.
Inkuru dukesha BBC ivuga ko uyu munyamakuru yahawe uruhushya rwo kwitabira inama yerekeye ibidukikije yabereye i Kinshasa mu kwezi kwa 10 mu gihe yari akirindiriye ko ubusabe bwe busubizwa.
Ku wa kabiri w’iki cyumweru mu kwezi kwa 11 /2022, yahamagajwe ku biro bikuru by’igipolisi cya Congo bishinzwe abinjira n’abasohoka, agezeyo bahita bamwambura urupapuro rwe rw’inzira ‘Passport’ bamwuriza indege ijya i Paris, inyuze Addis Abeba.
Sonia, ashimira abamwoherereje ubutumwa bwo kumwihanganisha. Yavuze ati “Ni bwo bwa mbere nirukanywe [mu gihugu] mu myaka 20 maze muri uno mwuga. Ndacyatangajwe no kuba uno musi bimbayeko muri Congo inyuma y’iyi myaka yose maze nkora itangazamakuru…”.
Yakomeje avuga ko nta mpamvu yabwiwe yatumye hafatwa iyi icyemezo cyo kumwirukana.
Hagati aho, Leta ya Congo ivuga ko “Dosiye ye yagaragaje ko yaciye ukubiri n’amategeko agenga abanyamahanga, bityo akaba yari muri gihugu mu buryo bunyuranije n’amategeko.”
Ishyirahamwe rirengera abamenyeshamakuru, Comité pour la Protection des Journalistes (CPJ), rivuga ko “kwirukana Sonia Rolley ari ikindi kimenyetso cy’uko uburenganzira bw’abanyamakuru muri DRC bubangamiwe.”
Angela Quintal, umugenzuzi wa CPJ muri Afrika, yavuze ati: “Abategetsi ba Congo bakwiye guhindura icyemezo cyabo cyo kwirukana Rolley kandi bagahagarika ibikorwa byose byo kubangamira abanyamakuru mu kazi kabo”.
Mu itangazo bacishije ku rubuga rwa Twitter, Minisiteri ishinzwe itumanaho muri Congo yavuze ko icyemezo cyo kwirukana uyu munyamakuru ntaho gihuriye n’uburenganzira bw’itangazamakuru, ko ahubwo kijyanye n’amategeko.
Buvuga ko dosiye ye yizwe n’inzego zibishinzwe zigasanga atujuje ibisabwa n’amategeko agenga abanyamahanga bakorera muri Congo, kandi ko iyi ngingo yamenyeshejwe uwo ireba hamwe n’ikinyamakuru akorera.
Reuters asanzwe akorera ivuga ko irimo gufasha Sonia Rolley mu gihe igisaba ibisobanuro ubutegetsi bwa Congo
Mu itangazo Reuters yasohoye yavuze ko “Tuzakomeza akazi k’itangazamakuru muri Congo mu buryo bwigenga kandi ntaho tubogamiye, nk’uko dusanzwe tubikora ahandi hose kw’isi”.
Amakuru avuga ko Sonia Rolley yurijwe indege shishi itabona adatwaye ibye, ndetse na passport ye yongeye kuyisubizwa i Paris mu Bufaransa.
