Itangazo ryashyizweho umukono n’Umuvugizi w’Inkiko, Mutabazi Harisson tariki ya 7 Mutarama 2022 rivuga ko abagana Inkiko bose bagomba kuba bisuzumishije Covid mu gihe kitarenze amasaha 24 kandi ko bagomba kuba barayikingije.
Iryo tangazo riragira riti “Ubuyobozi bw’Inkiko buramenyesha abazigana bose ko mu rwego rwo kwirinda Covid-19 ari ngombwa kugaragaza ikemezo cy’uko yisuzumishije Covid-19 mu masaha 24 ashize, ko kandi yikingije icyo cyorezo.”
Iri tangazo rivuga ko iki cyemezo kizatangira gushyirwa mu bikorwa kuwa mbere tariki 10 Mutarama 2022.
Itangazo ryaturutse mu Biro bya Minisitiri w’Intebe tariki 7 Mutarama 2022 rikubiyemo amabwiriza avuguruye yo kwirinda icyorozo cya Covid-19, abagenzi bagenda kuri moto n’amagare bagomba kuba barikingije Covid-19 ndetse n’ababatwaye kuri moto n’amagare. Abatazabyubahiriza bazafatirwa ibihano.”
Abemerewe kujya mu nsengero mu Mujyi wa Kigali ntibagomba kurenga 30% by’ubushobozi bwazo mu gihe mu bindi bice ari 50%. Hose bagomba kuba barikingije Covid-19.
Naho mu bukwe, kwiyakira birabujijwe. Gusaba no gukwa cyangwa se gusezerana imbere y’ubuyobozi no mu nsengero hemewe abantu batarenze 40 kandi nabwo bikaba byabanje kumenyeshwa ubuyobozi.
Muri restaurant, abakiliya bikingije Covid-19 ni bo bemewe gusa na ho mu tubari gufunga kwatwo ni saa mbili.
