Umukuru w’inyeshyamba zo mu karere ka Tigray mu majyaruguru ya Ethiopia yabwiye BBC ko bazakomeza kurwana kugeza hubahirijwe ibyo basaba kugira no agahenge kabeho.
Jenerali Tsadkan Gebretensae, w’imyaka 68, yavuze ko izi nyeshyamba akuriye zishaka guhatira leta ya Ethiopia gukuraho uruzitiro rubuza imfashanyo n’abantu kwinjira muri ako karere, kandi ikemera igisubizo kinyuze muri politiki cyo gusoza intambara.
Leta ya Ethiopia ihakana ivuga ko urwo ruzitiro ntaruhari kandi yavuze ko nta biganiro yagirana n’izo nyeshyamba.
Abantu babarirwa mu bihumbi barishwe kuva intambara yatangira mu kwezi kwa cumi na kumwe mu mwaka ushize.
Abantu babarirwa muri za miliyoni na bo bataye ingo zabo kubera imirwano, buri ruhande ruyirimo rushinjwa gukora ibikorwa byo guhonyora uburenganzira bwa muntu ndetse n’ibyaha byo mu ntambara.
Abantu batari munsi ya 400,000 babayeho mu nzara, nkuko bikubiye mu kigereranyo cy’umuryango w’abibumbye (ONU/UN), kugera muri ako karere bikaba bikirimo imbogamizi.
Mu mpera z’icyumweru gishize amakamyo atwaye imfashanyo y’ishami rya ONU ryita ku biribwa (PAM/WFP) yagezeho ashobora kugera muri Tigray nyuma yo kumara igihe ategereje kubera impungenge ku mutekano.
Ariko, Minisitiri wa Ethiopia ushinzwe gutsimbataza demokarasi Zadig Abraha yahakanye ko leta yari yarakumiriye imfashanyo ijya muri Tigray.
Yabwiye ikiganiro Newshour cya BBC ati: “Mu by’ukuri, leta yacu yatanze imfashanyo nyinshi cyane kurusha abafatanya-bikorwa bacu bose hamwe”.
Yashinje inyeshyamba “kwifashisha imvugo y’imfashanyo” mu gushaka ko amahanga azigirira impuhwe nk’izirimo kurenganywa.
Mu kwezi kwa gatandatu, leta ya Ethiopia yatangaje agahenge ku ruhande rwayo nyuma yuko inyeshyamba zigaruriye ibice byinshi, birimo no kwisubiza umurwa mukuru Mekelle wa Tigray.
Ariko leta yakomeje gukusanya imitwe yitwaje intwaro yo mu tundi turere tw’igihugu ngo ifashe guhagarika intambwe inyeshyamba ziri gutera muri leta za Afar na Amhara zihana imbibi na Tigray.
Ku cyumweru, Jenerali Tsadkan, wahoze ari umukuru w’ingabo za Ethiopia, yabwiye ikiganiro Newshour ko igitero cy’abarwanyi be mu turere duhana imbibi na Tigray kigamije gukuraho uruzitiro rw’ingabo za leta rubuza imfashanyo kugera muri Tigray.
Yavuze ko mbere yuko agahenge gashyirwa mu bikorwa, leta ya Ethiopia igomba:
- kureka kwibasira Abanya-Tigray
- gufungura imfungwa zifungiwe impamvu za politiki
- kwemera ibiganiro bihuriwemo na bose byo kugena ejo hazaza h’akarere ka Tigray
Yavuze ko iyi ntambara yashoboraga kuba yaririnzwe, ashinja Minisitiri w’intebe wa Ethiopia Abiy Ahmed kudashaka ko habaho igisubizo kinyuze mu nzira y’amahoro ku bushyamirane hagati ya leta ya Ethiopia n’ishyaka rya Tigray People’s Liberation Front (TPLF).
Jenerali Tsadkan ati: “Ndicuza ko ibi byabaye, ndicuza ko ibi byashoboraga kuba byaririnzwe, ariko nishimiye ko abaturage ba Tigray barwanye kandi [ubu] bari aho bashobora gusaba umwanya wabo bafitiye uburenganira wo kuri aka karere”.
Leta ya Ethiopia yamaganye ibisabwa na TPLF byo kugirana ibiganiro n’abakuriye izo nyeshyamba, ubu zirwanira mu mutwe uhuriwemo n’indi mitwe yitwaje intwaro yo muri Tigray, wa Tigray Defence Forces ( (TDF).
Bwana Zadig yavuze ko ibyo TPLF isaba ngo habeho agahenge “biva ku kwibeshya ko ifite ubutegetsi”, aburira ko leta igiye gukaza igitero cyayo cya gisirikare.
Yagize ati: “Turimo kuva mu gahenge ko gutuma imfashanyo itangwa, niba ushaka kureba uko urugamba rwa nyuma rwambikana, bizagusaba gutegereza ibyumweru bicye [biri imbere].
“Niturambirwa kwihangana, uzabona ukuntu tuzabirukana muri buri mujyi n’icyaro cyo ku butaka”.
Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n’ingabo za leta ya Ethiopia mu kwezi kwa cumi na kumwe mu 2020.
Leta ya Ethiopia ivuga ko TPLF ari umutwe w’iterabwoba, mu gihe inyeshyamba za TPLF zo zivuga ko ari zo leta y’akarere ka Tigray yemewe n’amategeko.
Abakuru ba TPLF bashwanye na Abiy ku bijyanye n’amavugurura muri politiki, nubwo kuba TPLF yarafashe ibigo bya gisirikare by’ingabo za leta byo muri Tigray ari yo yabaye imbarutso y’igitero leta yayigabyeho.
SRC:BBC
