Ingabo za Uganda (UPDF) zahakanye ibikubiye muri raporo y’inzobere z’Umuryango w’Abibumbye (ONU) ivuga ko zifasha inyeshyamba za M23 zirwanya ubutegetsi bwa Repubulika ya Demokarasi ya Congo, nkuko byatangajwe n’ikinyamakuru Daily Monitor cyo muri Uganda.
Umuvugizi wa UPDF Brigadiye Jenerali Felix Kulayigye yasubiwemo na Daily Monitor agira ati: “Raporo irabogamye. Ntishingiye ku bushakashatsi. Yifitemo guhengama.
“[Inzobere zayikoze] Ntibagize uburere bwo mu by’ubwenge [‘intellectual discipline’] bwo gushaka uruhande rw’inkuru rwacu cyangwa ngo bakoreshe ubutabera karemano.”
Brig Gen Kulayigye yavuze ko UPDF iheruka kugaba ingabo mu ntara ya Kivu ya Ruguru mu Kuboza (12) mu 2023, mu rwego rw’umutwe w’ingabo z’akarere k’Afurika y’uburasirazuba.
Raporo y’inzobere za ONU inashinja Uganda gufasha ihuriro rya ‘Alliance Fleuve Congo’ rikorana n’inyeshyamba za M23.
Iyo raporo yanavuze ko nubwo abakuru ba M23 bafatiwe ibihano na ONU, bagikomeje gukora ingendo banyuze ku kibuga mpuzamahanga cy’indege cya Entebbe muri Uganda.
Iyi raporo ntirashyikirizwa ONU mu buryo bweruye. BBC Gahuzamiryango ntirabona iyi raporo yose hamwe.
Mu 2021 Uganda yongeye kohereza abasirikare muri DR Congo, aho ibihugu byombi bikorana ibikorwa bya gisirikare byo kurwanya umutwe w’inyeshyamba za ADF ukomoka muri Uganda ukorera mu burasirazuba bwa DR Congo.
@BBC
