Urukiko rwisumbuye i Karongi kuwa kabiri rwahanishije umushoramari w’umushinwa gufungwa imyaka 20 kubera iyicarubozo, nyuma y’amashusho yakwiriye akubita abantu baziritse ku giti.
Sun Shujun yireguye avuga ko yari yaburiye abajura bamwiba, ashobora kujuririra uwo mwanzuro.
Muri Kanama 2021 ku mbuga nkoranyambaga habonetse amashusho y’umugabo bivugwa ari umushinwa akubita abagabo baziritse amaboko ku giti.
Byavuzwe ko uwo ari Sun Shujun washoye imari mu bucukuzi bw’amabuye y’agaciro yakubitiye mu karere ka Rutsiro abashinja kumwiba.
Bamushinja ko yashinze igiti kimeze nk’umusaraba ahari ibikorwa bye mu kagari ka Kagano, Umurenge wa Mukura, muri Rutsiro, avuga ko ari ho azahanira ‘abajura’.
Muri video bivugwa ko yafashwe na bamwe mu bakozi be, umushinwa aboneka ari gukubita umugabo uziritse ku giti amubaza aho yajyanye umucanga bayungurura bavanamo amabuye y’agaciro, undi atakamba asaba imbabazi.
Umugabo umwe mu bakozi be uregwa ubufatanyacyaha mu iyicarubozo na Sun Shujun we yakatiwe gufungwa imyaka 12.
@BBC
