Sena ya Repubulika ya Demokarasi ya Congo yambuye ubudahangarwa Augustin Matata Ponyo Mapon wahoze ari Minisitiri w’intebe, ngo bitume ashobora gukurikiranwa mu maperereza ku inyerezwa ry’imari ya leta.
Ponyo ari gukorwaho iperereza ku ruhare bivugwa ko yagize mu mushinga w’ubuhinzi utaragize icyo ugeraho.
Sena yari yaranze ubusabe bw’urwego rw’ubucamanza bwo kumukuraho ubudahangarwa kugira ngo aburanishwe.
Abakora iperereza bavuga ko miliyoni 200 z’amadolari y’Amerika (arenga miliyari 201 mu mafaranga y’u Rwanda) zaburiwe irengero mu gihe cy’ishyirwa mu bikorwa ry’uwo mushinga w’ubuhinzi, nkuko bitangazwa n’ibiro ntaramakuru Reuters.
Bivugwa ko Ponyo ari we wize uwo mushinga, ateganya uko wakorwa ndetse yiyemeza ko ushorwamo amafaranga.
Ahakana avuga ko nta kintu kibi yakoze.
Bwana Ponyo yabaye Minisitiri w’intebe kuva mu 2012 kugeza mu 2016, ku butegetsi bw’uwari Perezida Joseph Kabila.
