Ni igikorwa ngaruka kwezi aho abakunzi b’umukino wa Billiard bashyiriweho irushwanwa ryawo.Kuri uyu wa gatandatu tariki ya 27.07.2024 irushanwa ryabereye muri West Gate kwa Buntu aho ryitabiriwe n’abantu 40 harimo ab’igitsinagore babiri.
Umuyobozi wa Gasana Game, Gasana Valens yatangarihe IRIBA ko impamvu y’iki gikorwa ari ukuvana abantu mu bwigunge.
Yagize ati: “Ni ku nshuro ya 11 iri rushwanwa riba. Twatangiye ryitabiriwa n’abanya Rubengera gusa ariko mwabibonye ko rimaze gufata indi ntera aho uyu munsi ryitabiriwe n’abaturutse mu ntara zinyuranye z’igihugu mwabonye aba Rubavu, Kigali, amajyaruguru n’ahandi.”
Yakomeje ati: “Umwihariko w’uyu munsi n’uko hitabiriye n’igitsina gore akaba ari ubwa mbere bibayeho tukaba twifuza ko ubutaha tuzashyiraho n’irushwanwa ryihariye ry’igitsina gore.”
Umugore witwa Dusabe Solange w’imyaka 42 waturutse i Kigali, akaba yegukanye umwanya wa gatatu.
Yavuze ko akunda umukino wa billiard . Ati: “Nabonye abantu bakina billiard nanjye ndayikunda natangiye gukina kera, bigeze aho ndabihagarika ariko kuko ari umuhamagaro wanjye nongera kuwusubukura mwabibonye namwe ko nahigitse abagabo bikaba binyongereye imbaraga zo gukunda uyu mukino birushijeho. Ubutaha nzaharanira gutahana umwanya wambere, nkaba nshishikariza abagore bagenzi banjye gutinyuka bakajya bitabira amarushanwa nk’aya.”
Bamwe mu bakunzi b’imyidagaduro bo mu mujyi wa Karongi bavuga ko bishimira iki gikorwa.
Uwitwa Ingabire ati: “Batugiriye neza twajya tubona uburyo nk’ubu bwo kwitagadura mu mpera z’icyumweru[ …]twari tuvuye mu muganda twari kugenda tukigunga ariko murabona ko badususurikije.
Bane ba mbere muri iri rushanwa bahawe ibihembo binyuranye.
Nyirimanzi Jean Claude waturutse i Kigali niwe wabaye uwa mbere, akaba yahembwe amafaranga y’u Rwanda ibihumbi (100.000 frw) n’ikaziye ya Amstel.
Uwa kabiri ni Christian Ngenzi Iraduha waturutse mu Karere ka Kamonyi, yahembwe ibihumbi 50 n’ikaziye ya Amstel.
Umwanya wa gatatu wegukanywe na Dusabe Solange wahembwe ibihumbi 30 n’ikaziye ya Mutzing. Umwanya wa kane wegukanywe na Jacques Nkurunziza wegukanye ibihumbi 20 n’ikaziye ya Mutzing.
Yanditswe na Gashonga Jean Claude
