Image default
Ubuzima

Ibihugu by’Afurika birasabwa gushira amakenga urukingo rwa ‘AstraZeneca’

Umukozi mukuru w’ishami rya UN rishinzwe ubuzima ku isi OMS/WHO arasaba leta z’ibihugu bya Africa kudatakaza icyizere ku rukingo rwa Oxford-AstraZeneca, nyuma y’uko ibihugu byinshi i Burayi bihagaritse kurukoresha.

Ibihugu bya Africa bimaze kwakira doze zirenga miliyoni 14, ahanini z’urukingo rwa AstraZeneca, kuko ruhendutse kandi rworoshye kubika ugereranyije n’andi moko y’inkingo za Covid yemejwe.

Dr Richard Mihigo ukuriye ishami rijyanye no gukingira muri OMS muri Africa avuga ko kugeza ubu uru rukingo rugaragaza ko nta kibazo ruteje. Ibihugu bigera kuri 24 bya Africa byatangiye gukingira bikoresheje izi nkingo byahawe muri gahunda ya Covax.

Mihigo yabwiye BBC ko basaba ibihugu bya Africa gufata ibyemezo bishingiye ku bimenyetso bifatika n’amakuru.

Kugeza ubu, Repubulika ya Demokarasi ya Congo na Cape Verde (Cap-Vert) ni byo bihugu bya Africa bimaze kuba bisubitse gahunda yo gukingira, kubera ibivugwa byo kwipfundika kw’amaraso kubera uru rukingo.

Mu Rwanda, abarenga 317,000 bamaze gukingirwa hakoreshejwe inkingo za AstraZeneca na Pfizer, abashinzwe ubuzima bavuze ko nta mpungenge abakingirwa bakwiye guterwa n’urukingo rwa AstraZeneca.

Ikigo cy’Uburayi kigenzura imiti – kiri gukora iperereza ku mubare w’abagize kwipfundika kw’amaraso nyuma yo kuruterwa – cyasubiyemo ko kibona ibyiza by’uru rukingo bisumba ingaruka zarwo.

Abantu barenga miliyoni enye batangajwe ko banduye Covid-19 muri Africa naho abo yishe barenga 107,000, nk’uko bivugwa na OMS ishami rya Africa.

Related posts

Ingorane ababyeyi bahura na zo mu gihe cyo kubyara bambaye agapfukamunwa

Emma-marie

Igihugu cya mbere muri Afurika cyarengeje miliyoni y’abanduye Coronavirus

Emma-marie

OMS ivuga ko itazi impamvu abakozi bayo birukanwe mu Burundi

Emma-marie

Leave a Comment

Skip to toolbar