Kuri uyu wa Gatanu, Rayon Sports yanganyije na Panthère du Ndé yo muri Cameroon igitego 1-1, mu mukino ubanza w’ijonjora ry’ibanze rya CAF Confederation Cup 2026/2027. Nubwo yatangiye umukino bamwe mu bakinnyi bayo batifitiye ikizere, umusaruro yakuye muri Cameroon uyihaye icyizere cyo kwitwara neza mu mukino wo kwishyura.
Uyu mukino watangiye saa Kumi n’Imwe z’umugoroba, ubera kuri Ahmadou Ahidjo Stadium. Rayon Sports ntiyatangiye neza, iza no gutsindwa igitego ku munota wa 15.
Nyuma y’uko ba myugariro ba Rayon Sports bahagaze nabi mu rubuga rw’amahina, Valentin Beo Batto yatsinze igitego cyiza ubwo yitambikaga mu kirere agatera umupira atareba mu izamu, awurenza umunyezamu Dande Junior.
Igice cya mbere cyarangiye Panthère du Ndé iyoboye n’igitego 1-0.
Mu ntangir
iro z’igice cya kabiri, Rayon Sports yakoze impinduka, ikuramo Nisingizwe Christian wari wagowe n’umukino mu kibuga hagati, ishyiramo Ibrahim Mansour Djingarey. Izi mpinduka zatumye Rayon Sports itangira gutuza no guhererekanya umupira neza, ndetse irushaho gushaka igitego cyo kwishyura.
Umutoza Haringingo Francis yakomeje gukora impinduka, aza no gushyiramo Muhoza Daniel, wagize uruhare rukomeye mu gitego cyo kwishyura cyabonetse ku munota wa 80.
Muhoza yateye ishoti rikomeye, umunyezamu wa Panthère du Ndé arikuramo ariko ntiyabasha gufata umupira neza. Ba myugariro b’iyi kipe bananiwe kuwukuraho, bituma rutahizamu Junior Kameni awushyira mu izamu n’umutwe, Rayon Sports ibona igitego cyo kwishyura.
Umukino warangiye amakipe yombi anganya igitego 1-1.
Nyuma y’umukino, umutoza wa Rayon Sports, Haringingo Francis, yavuze ko ikipe ye itatangiye neza, ahanini bitewe n’uko bamwe mu bakinnyi binjiye mu kibuga batifitiye ikizere.
Yagize ati: “Twinjiye mu mukino nabi. Mu gice cya mbere, bamwe mu bakinnyi bacu wabonaga batifitiye ikizere, bituma dutsindwa igitego hakiri kare kandi Panthère du Ndé itaturushaga. Mu gice cya kabiri twakoze impinduka tumaze kubona ko nta kidasanzwe iturusha, dutangira gukina neza.”
Rayon Sports izakira Panthère du Ndé mu mukino wo kwishyura uteganyijwe ku wa 12 Nzeri 2026, saa Kumi n’Ebyiri z’umugoroba, kuri Stade Amahoro.
