Ikipe ya Al-Merrikh yo muri Sudani yatangiranye imbaraga Shampiyona y’u Rwanda itsinda Kiyovu Sports ibitego 2-0 mu mukino wabereye kuri Kigali Pele Stadium ku mugoroba wo ku wa Mbere, tariki ya 24 Ugushyingo 2025.
Ni ubwa mbere mu mateka ikipe itari iy’u Rwanda ikinnye umukino wa Shampiyona y’u Rwanda, nyuma y’uko Al-Merrikh na Al-Hilal SC zemerewe gukina hano mu Rwanda kubera ko muri Sudani Shampiyona yahagaze kuva mu 2023 kubera intambara.
Umukino watangiye ubona amakipe yombi agenda gahoro, umupira ukinirwa cyane hagati nta muhate mwinshi wo gushaka ibitego.
Ku munota wa 11, Kiyovu Sports yabonye amahirwe ya mbere ubwo Uwineza Rene yinjiranaga umupira agacibwa integer Wah Dia, awusubiza inyuma kuri Nizigiyimana Karim wahise ateresha ishoti risubira hejuru y’izamu.
Ku munota wa 20, Al-Merrikh yatangiye kwigaragaza, itangira kwiharira umupira ndetse igatera ishoti rikomeye rya Idris Fatokun, ryahinduwe koruneri n’Umunyezamu James Bievenu.
Sudani yakomeje kwiharira umukino, Kiyovu Sports nayo igaragara ko iri hasi mu mbaraga. Ku munota wa 40, Daba Sogoba aciye ku ruhande rw’iburyo, ageze mu rubuga rw’amahina akorerwaho amakosa n’abakinnyi ba Kiyovu umupira ujya hanze.
Igice cya mbere cyarangiye amakipe yombi anganyije 0-0.
Igice cya kabiri cy’umukino
Mu gice cya kabiri, Kiyovu Sports yagarukanye imbaraga, Amiss Cedric agerageza kuroba umunyezamu Brahima Sanou ku mutwe ariko umupira ujya hejuru y’izamu.
Al-Merrikh yahise isubiza, Daba Sogoba akongera kugira uruhare mu guhanga ubdanger, ateresha umupira ujya mu izamu ariko Ishimwe Jean René awukuramo awushyira muri koruneri.
Ku munota wa 67, Al-Merrikh yafunguye amazamu ku gitego cya Daouda Ba, wari uturutse inyuma y’urubuga rw’amahina atera ishoti rikomeye ritabashije gukurwamo n’umunyezamu.
Ku munota wa 86, Mohammed Teya Abudegen yatsinze icya kabiri, nyuma yo gufata umupira wavuye ku ruhande rw’ibumoso, awutera neza mu izamu.
Al-Merrikh SC yasoje umukino iyoboye ku ntsinzi ya 2-0, itangira neza urugendo rwayo muri Shampiyona y’u Rwanda.
Ikipe yo muri Sudani izasubira mu kibuga ku wa Kane, tariki ya 27 Ugushyingo 2025, isura Bugesera FC.
Kiyovu Sports yo yagumye ku mwanya wa 8 n’amanota 10 mu mikino icyenda, ikazakina na Gorilla FC ku wa Gatanu mu mukino w’umunsi wa 10 wa Shampiyona.
