Christophe Nangaa yaraye atangajwe ku rutonde rw’abadepite batsinze amatora yo ku rwego rw’inteko zishinga amategeko z’intara muri DR Congo, hari hashize amasaha macye akoresheje ikiganiro n’abanyamakuru i Kinshasa aho yavuze ko atandukanye n’umuvandimwe we Corneille Nangaa.
Christophe Baseane Nangaa asanzwe ari guverineri w’intara ya Haut-Uélé, aha ni naho we na mukuru we Corneille Nangaa bavuka, ndetse bombi hano bahafatwa nk’abanyapolitike bakomeye.
Corneille Yobeluo Nangaa yahoze ari perezida wa komisiyo y’amatora kuva mu 2015 kugeza mu 2021, nyuma ntiyavuze rumwe n’ubutegetsi bwa Tshisekedi ndetse atangaza ko ashaka kwiyamamariza kuba perezida, nyuma yiyunze ku mutwe wa M23.
Mu kiganiro n’abanyamakuru ku cyumweru, Christophe Nangaa yavuze ko Corneille “ni umuvandimwe. Ndi umwana wa kane nyuma ya Nangaa”, yongeraho ko ibyo arimo gukora “bimureba wenyine”.
Ibinyamakuru muri DR Congo bisubiramo guverineri Christophe agira ati: “Umuryango wa Nangaa ntiwigeze ufata intwaro. Ni umuntu mukuru. Yahisemo inzira ye natwe twahisemo iyacu.
“Natoye Felix Tshisekedi. Iwacu ku ivuko, data, yatoye Felix Tshisekedi. Sinzi ko hari ikindi kintu umuntu yakora ngo ahamye uburyo turi mu ruhande rwa Union sacrée.” Iryo ni ihuriro ry’amashyaka ashyigikiye Tshisekedi.
Mukuru we Corneille Nangaa nyuma yo kuva ku mwanya w’umukuru wa komisiyo y’amatora mu 2021 yinjiye muri politike, mu 2023 yashinze ishyaka “Action pour la dignité du Congo et de son peuple” (ADCP) ndetse atangaza ko aziyamamariza kuba perezida mu matora ya 2023.
Muri Nzeri (9) uwo mwaka yatangaje ko Perezida Tshisekedi yabeshye ko atigeze agirana ubwumvikane n’uwo yasimbuye Joseph Kabila ngo amufashe gutsinda amatora amusigire ubutegetsi.
Nangaa – wari perezida wa komisiyo y’amatora – yavuze ko yari umwe mu banditse ayo masezerano yasinywe mbere yo gutangaza ibyavuye mu matora.
Amatora ya 2018 yamaganywe na Martin Fayulu wabaye uwa kabiri wavuze ko yibwe amajwi.
Amaherezo, Corneille Nangaa ntiyemerewe kwiyamamaza mu 2023, yongeye kumvikana yinjize ishyaka rye mu ihuriro ryiswe Alliance Fleuve Congo (AFC) ryashingiwe i Nairobi muri Kenya mu Ukuboza gushize mbere gato y’amatora muri Congo.
Christophe Nangaa
Nyuma, Corneille Nangaa yabonetse ari kumwe n’abakuru b’umutwe wa M23 aho bicyekwa ko ari mu gace kagenzurwa na M23, ndetse yasohoye itangazo risaba rubanda kwiyunga kuri AFC bagakuraho “byihutirwa” Perezida Felix Tshisekedi.
Corneille na murumuna we Christophe, bombi bari mu myaka irenga 50, ubu biraboneka neza ko bari ku mpembe ebyiri zitandukanye za politike y’iki gihugu, aho umwe ari guverineri wo mu ruhande rwa perezida w’igihugu, undi akaba ari umwe mu bakuriye umutwe w’inyeshyamba zirwanya ubwo butegetsi.
@BBC
