Minisiteri y’Ubuzima ‘Minisante’ iratangaza ko abantu 9 mu bafungiye muri Gereza ya Byumba ahazwi nko mu Miyove, aribo bari mu kato nyuma yo kugaragaraho ubwandu bwa Covid-19, ibi bikaba bitandukanye n’amakuru avuga ko hari umubare munini w’imfungwa n’abagororwa banduye bakaba badashyirwa mu kato.
Amakuru agera ku Iriba News, avuga ko muri Gereza ya Gicumbi hari imfungwa n’abagororwa basaga 150 bapimwe basangwamo ubwandu bwa Covid-19 guhera mu mpera z’Ukuboza 2020.
Uwaduhaye amakuru yagize ati “Tariki 8/1/2021 hapimwe abantu 15 basangamo 8 barwaye, tariki 14 /1 bapima abantu 42 basangamo 30, tariki ya 15/1/2021 bapimye abantu 188 basangamo 145 barwaye[…] abamerewe nabi babajyanaga mu kato i Musanze, abandi babajyana ahabugenewe I Byumba mu Mujyi, ariko harimo abagiye mbere barakize baragaruka imibare sinyifite nonaha”.
“Ubu rero hari ikibazo cy’uko abagaragayeho ubwandu bamaze kuba benshi ku buryo ubuyobozi bwa gereza bwafashe icyemezo cyo kujya bujyana mu kato abarembye, abandi bakagumana n’abazima muri gereza”.
“Ayo makuru si ukuri”
Umuvugizi w’Urwego rw’Igihugu rushinzwe imfungwa n’abagororwa , SSP Uwera Gakwaya Pelly, yabwiye Iriba News ko ibijyanye n’aya makuru twabibaza RBC.
Umuyobozi muri Minisiteri y’Ubuzima ushinzwe imikoranire n’Itangazamakuru, Julien Mahoro Niyingabira, yabwiye Iriba News ko ibivugwa ko hari abafite ubwandu bwa Covid-19 muri gereza ya Byumba badashyirwa mu kato atari ukuri.
Yagize ati “Kugeza ubu abarwaye ni abantu 9 kandi bose bari mu kato[…] Ayo makuru avuga ko hari abarwayi badashyirwa mu kato si ukuri kuko hari ahabugenewe bashyirwa mu kato”.
Muri Mata 2020, RCS yatangaje ko hafashe ingamba zitandukanye zo guhangana n’icyorezo cya Covid-19. Muri izo ngamba harimo guhagarika urujya n’uruza kuri za gerezo zose zo mu Rwanda, abaje gufungwa bashya nabo bakaba baza bazanye icyangombwa cy’uko nta bwandu bafite.
Inkuru bifitanye isano: https://iribanews.rw/2020/05/16/imfungwa-nabagororwa-babayeho-bate-muri-ibi-bihe-bya-covid-19/
Minisiteri y’Ubuzima (MINISANTE) yatangaje ko ku wa kabiri tariki 02 Gashyantare 2021, mu Rwanda abantu barindwi bitabye Imana bishwe na COVID-19. Habonetse abanduye bashya 229, naho abakize ni 473. Abitabye Imana ni abagore bane b’imyaka 75, 50, 37 (i Kigali), 64 (i Rulindo) hamwe n’abagabo batatu b’imyaka 80, 60 (i Kigali) na 66 (i Nyaruguru).
Iriba.news@gmail.com
