Perezida Xi Jinping w’Ubushinwa yafashwe amashusho ashinja Minisitiri w’intebe wa Canada gushyira hanze ibyo baganiriye mu nama, nyuma y’uko baganiriye iruhande rw’inama ya G20 muri Indonesia.
Biciye ku musemuzi, Xi yabwiye Trudeau ko ibyo ari ibintu bidakwiye kandi amushinja kubura “ubunyakuri”.
Birashoboka cyane ku yavugaga ku kuba Trudeau yaravuze ku butasi bushinjwa Ubushinwa no kwivanga mu matora yo muri Canada, ibyo baganiriyeho bicaranye.
Ikiganiro cyabo, cyabereye mu muhezo, cyari icya mbere mu myaka myinshi hagati ya bombi.
Mu mashusho, yafashwe n’abanyamakuru muri iriya nama y’abategetsi bo ku isi, Xi na Trudeau baboneka bahagararanye baganira biciye ku musemuzi.
Xi yumvikana abwira Trudeau mu rurimi rw’Igishinwa ati: “Ibintu byose twaganiriye byasohotse mu binyamakuru kandi ibyo ntabwo bikwiriye.”
Aya mashusho yerekana mu buryo busanzwe cyane Perezida Xi, ubundi amashusho ye abanza kwitonderwa cyane n’ibinyamakuru bya leta mu Bushinwa.
Nyuma yo guseka no kwemera akoresheje umutwe, Minisitiri w’intebe wa Canada asubiza agira ati: “Muri Canada twemera kuganira kwisanzuye, kudahisha kandi mu kuri kandi ibyo nibyo tuzakomeza kugira.”
Yongeraho ati: “Tuzakomeza gushaka gukorera hamwe ariko hazabaho ibyo tutemeranya.”
Mbere y’uko Trudeau arangiza, Xi amuca mu ijambo akamubwira ati “mbere na mbere ubanze utunganye ibisabwa” nyuma akamuha ikiganza akagenda.
Iki kiganiro gito ariko cyerekana byinshi gikubiyemo ukutumvikana hagati ya Canada n’Ubushinwa, guhera kuva Meng Wanzhou wari ukuriye Huawei Technologies muri Canada yafungwa mu 2018 Ubushinwa nabwo bugafunga abanyaCanada babiri bubashinja ubutasi.
Bose nyuma baje kurekurwa.
Gusa ubushyamirane bwongeye kubura nyuma yo gufatwa kwa Yuesheng Wang umukozi wa leta mu kigo Hydro-Quebec washinjwe ubutasi.
Wang “yageze ku mabanga y’ubucuruzi mu nyungu za leta y’Ubushinwa, mu gihombo cy’inyungu z’ubukungu za Canada” nk’uko byatangajwe na polisi ya Canada.
Muri icyo gihe Trudeau na Xi bari mu nama ya G20 ku kirwa cya Bali muri Indonesia.
@BBC
