Urukiko rwo muri Brazil rwategetse Perezida Jair Bolsonaro kuriha impozamarira ku munyamakuru w’umugore nyuma yuko amuvuzeho amagambo amutesha agaciro.
Mu mwaka ushize, Bolsonaro yavuze ko Patrícia Campos Mello yemeye ko yakorana imibonano mpuzabitsina n’umugabo ngo amuhe amakuru avuga nabi Perezida Bolsonaro.
BBC dukesha iyi nkuru yatangaje ko umucamanza yavuze ko amagambo ya Bolsonaro yahindanyije icyubahiro cy’uwo munyamakuru.
Perezida yategetswe kumuriha impozamarira y’ama-reais (akoreshwa muri Brazil) 20,000, ni ukuvuga miliyoni 3,3 mu mafaranga y’u Rwanda. Ashobora kujuririra iki cyemezo.
Campos Mello, umunyamakuru watsindiye ibihembo mu mwuga we ukorera ikinyamakuru Folha de S.Paulo gisohoka buri munsi muri Brazil, yavuze ko icyo cyemezo cy’umucamanza ari “intsinzi kuri twebwe twese abagore”.
Umuryango w’abanyamakuru barwanya itotezwa, wanditse kuri twitter ko ari “umunsi ukomeye” ku banyamakuru b’abagore no ku itangazamakuru ry’umwuga muri Brazil . Bolsonaro w’imyaka 66 Perezida wa Brazil kuva mu kwezi kwa mbere mu 2019 afite amateka yo kwanga bikomeye abanyamakuru bakora inkuru zinenga ubutegetsi bwe.
Madamu Campos Mello yareze perezida bijyanye n’amagambo yavuze mu kwezi kwa kabiri mu 2020.
Mu nkuru kuri ayo magambo, ikinyamakuru Folha cyashinje Bolsonaro gutuka Campos Mello mu magambo aganisha ku mibonano mpuzabitsina.
Bolsonaro yavuze ko uwo munyamakuru “yashatse inkuru itaboneka ahandi” ku “kiguzi icyo ari cyo cyose indwanya”, nkuko icyo kinyamakuru cyasubiyemo amagambo kivuga ko ari ayo perezida yavuze.
Yatsinze n’umuhungu wa perezida
Campos Mello yanditse urukurikirane rw’inkuru z’iperereza ku itsinda rikoresha WhatsApp mu kongerera imbaraga ibikorwa byo kwamamaza Bolsonaro riharabika abo bahatanye, mbere yuko amatora ya perezida yo mu 2018 aba.
Mu kwezi kwa mbere, Madamu Campos Mello yanatsinze urundi rubanza rujya gusa n’urwo yari yarezemo Eduardo, umuhungu wa perezida, akaba ari n’umudepite mu nteko ishingamategeko ya Brazil.
Muri videwo yo kuri YouTube yo mu kwezi kwa gatanu mu 2020, yabaye nk’uvuga ko uwo munyamakuru “yagerageje kureshya” umuntu ngo amuhe amakuru ahindanya se.
Umucamanza yavuze ko ayo magambo ari igitero cyibasiye icyubahiro cy’uwo munyamakuru.
Nuko umucamanza ategeka uwo muhungu wa Bwana Bolsonaro kuriha umunyamakuru impozamarira y’ama-reais 30,000 (arenga miliyoni 5 mu mafaranga y’u Rwanda).
