Imbere y’umukino wo kwishyura hagati ya Real Madrid na Chelsea mw’irushanwa rya Champions League, BBC irareba impamvu uyu mutoza wa Real watwaye hafi buri gikombe cyose gikomeye hari abakimushidikanyaho ku isi.
“Ntiwatwara Champions Leagues eshatu, La Liga ebyiri, ukanatsida imikino 13 muri 14 yo gukuranamo y’amarushanwa y’i Burayi utari umutoza mwiza, ibi birarenze.”
Biragoye kubihakana, mu gihe umunyamakuru w’imikino w’Umufaransa Julien Laurens avuze atyo ku mateka ya Zinedine Zidane mu kiganiro kuri podcast Euro Leagues.
Ariko abantu barabihakana. Ndetse benshi.
Nubwo yatwaye ibikombe birindwi bikomeye mu myaka ine n’igice atoza Real Madrid, hari abakibona Zidane nk’umuntu wahuriranye n’amahirwe kurusha uko ari umutoza w’umuhanga.
Mbere y’umukino wo kwishyura wa kimwe cya kabiri muri Champions League hagati ya Real ya Zidane na Chelsea – amakipe yombi ubu afite igitego 1- 1 – BBC Sport irareba impamvu ki Zizou hari abakimushidikanyaho nubwo yageze kuri ibyo byose.
Zidane nk’umutoza wa Real Madrid
Kuva – 4/01/2016 Kugera – 31/05/2018 Imikino – 149 Intsinzi ku % – 70.47Ibikombe: La Liga, Champions League (3), Club World Cup (2)
Kuva – 11/03/2019 Kugera – Ubu Imikino – 109 Intsinzi ku % – 60.19 Ibikombe – La Liga
‘Niba ndi umunyamahirwe nta kibazo’
Zidane ni umwe mu batoza batatu gusa bafite ibikombe bitatu bya European Cup/Champions League muri CV zabo, ariko abandi babiri – Bob Paisley na Carlo Ancelotti ntawatwaye bitatu yikurikiranya.
Bwa mbere atoza Real Madrid umwaka wose w’imikino, yatwaye byombi La Liga na Champions League (bwa mbere muri iyi kipe kuva mu 1958), anatwara igikombe cya Club World Cup, aho mu mikino yose uwo mwaka yayitsinze kuri 70%.
Yongeye kugarurwa nk’umutoza wa Real yatwaye La Liga umwaka ushize, ndetse birashoboka ko uyu mwaka w’imikino ashobora kuwutwaramo indi La Liga n’igikombe cy’i Burayi.
Tugiye ku mukino wo kuri uyu wa gatatu na Chelsea, umwaka ushize atsindwa muri 1/8 na Manchester City 4 – 2 mu mikino yombi nibwo bwa mbere yari atsinzwe mu mikino 14 ya ‘knockout’ muri Champions League.
Hari ababona ariko ko ibyo yagezeho biva ku ikipe ikomeye cyane yahawe kurusha ubuhanga bwe – cyane igihe Cristiano Ronaldo yari ku gasongero k’ibihe bye.
Hakiyongeraho ingero z’amahirwe yamusekeye mu kibuga: gutombola ikipe imworoheye no gutsinda kuri za penaliti ikipe ya Atletico Madrid kuri final ya 2016; no mu 2017 muri 1/4 akina na Bayer Munich aho umukinnyi wa Bayern yahabwaga ikarita itukura mu mukino ubanza n’uwo kwishyura, ikanahusha penaliti, hamwe no kubura kubera imvune mu minota 30 ya mbere kwa Mohamed Salah na Loris Karius muri final ya 2018 bakina na Liverpool.
Ku byo Zidane yagezeho, ntabwo yirengagiza amahirwe mu rugendo rwe muri Real.
Mu kwezi kwa mbere mu 2020 yabwiye abanyamakuru ati: “Nemera ko nshobora kuba ndi umunyamahirwe, nagiye ngira amahirwe mu buzima. Ngomba kubishimira no kubikorera. Niba utekereza ko ndi umunyamahirwe ubwo ni ko bimeze. Ntabwo ari ikibazo.”
Zidane ntashobora kugenzura amahirwe, ariko ashobora kugenzura uko ikipe ye yitwara mu kibuga.
Nk’uko byaganiriweho muri podcast ya Euro League, ni umuhanga mu gutoza kurusha uko abyitwa.
Guillem Balagué, umunya-Espagne w’umwanditsi ku mupira, agira ati: “Hari ibintu Zidane akora bigira ingaruka ku mupira. Utuntu duto nko kuri Liverpool [muri 1/4 cya Champions League ku mukino wo kwishyura] no kwemera ko barushijwe mu mukino.”
Julien Laurens arakomeza, avuga ko Zidane afata imyanzuro irimo ubwenge adashimirwa ngo avugwe imyato nk’abandi batoza.
Ati: “Bakunze kumwita uwafatiye ku mahirwe? Ibyo ni amafuti. Ashobora kuba atari Johan Cruyff cyangwa Arrigo Sacchi cyangwa Pep Guardiola mu mpinduramatwara y’umupira, ariko iyo Joao Cancelo akina neza mu kugarira bavuga ko ari umuhanga waremwe na Guardiola.
“Ariko iyo Mendy akoze akazi nk’ako muri Real Madrid, nta muntu uvuga ko Zidane ari umuhanga.”
Balagué yongeraho ati: “Uyu ni umwaka wo kwiyerekana mu bihe byo gutoza bya Zidane. Kubura kwa Sergio Ramos na Dani Carvajal kubera imvune, kubura kwa Ronaldo (wagiye muri Juve) – bivuze ko agomba gukoresha ibishoboka byose ku ngufu afite.”
‘Iyo Zidane avuze, abakinnyi barumva’
Ancelotti, wari wungirijwe na Zidane nk’umutoza wa Real mu 2013-2014, rimwe yakomoje ku hantu impano ya Zidane mu gutoza iri.
Yagize ati: “Afite (Zidane) ibyangombwa byose byo kuba umutoza mwiza:impano, uwo ari we n’inararibonye. Iyo Zidane avuga, abakinnyi barumva.”
Bisobanuye impamvu Zidane ari umuntu ukwiriye kuba muri Real, ikipe mu mateka yagiye igura abakinnyi bageze ku gasongero kabo, aho kugura abakiri kuzamuka.
Balagué ati: “Real Madrid izakomeza kugura abakinnyi beza kurusha abandi bahari. Bakeneye umutoza nka Zidane ugira akantu abongereraho ariko unabareka bakigaragaza.”
Birashoboka ko icyerekana uburyo Zidane ajyanye neza na Real Madrid ari uburyo iyi kipe yitwaye ubwo yari yatandukanye nayo mu gice cya mbere cy’umwaka w’imikino wa 2018-2019.
Ku butoza bwa Julen Lopetegui n’uwamusimbuye by’agateganyo Santiago Solari, Real yabaye iya gatatu muri La Liga, irushwa amanota 19 na Barça ya mbere, no muri 1/8 cya Champions League yandagazwa na Ajax.
Laurens ati: “Sinzi impamvu abantu babona ko nta wundi watoza Real Madrid. Nta wundi wayitoza kandi twarabibonye ubwo Zidane yahavuye ubushize.”
Balagué we ati: “Ntiwavuga ngo Zidane ni nta makemwa kuko kuzamura abakinnyi ni mu byo adakora neza. Kuri Zidane nta byo kwiminjiramo agafu ugatera imbere kandi ni cyo ikipe yamunengaga – ashobora gukora abakinnyi bakiri bato bagakomera? We abaha umwanya n’icyizere – ariko ibindi? Ibyo ntabyo abaha.”
Ubu ariko, ni ikindi gihe cyiza ari kumwe na Real.
Laurens ati: “Iyo urebye ibyavuye ku mikino ikomeye uyu mwaka w’imikino, nta wundi wakoze neza nka we, bashobora gutwara La Liga na Champions League nanone – kandi ibi yigeze kubikora. Tumwubahe.”
SRC:BBC
