Perezida Samia Suluhu Hassan yashyize umukobwa we hamwe n’umugabo we umukwe we muri guverinoma nshya ya Tanzania, igikorwa kirimo kugarukwaho cyane ku mbuga nkoranyambaga mu karere.
Muri iyi guverinoma yatangajwe uyu munsi, Wanu Hafidh umukobwa wa Samia Suluhu yagizwe minisitiri wungirije w’uburezi siyanse n’ikoranabuhanga, naho umugabo we Mohamed Mchegerwa agirwa minisitiri w’ubuzima, Mchegerwa yari asanzwe ari minisitiri mu biro bya perezida.
Samia kandi yashyizeho minisiteri itari isanzweho, Ministeri y’Ibireba Urubyiruko. Ibi bibaye nyuma y’imyigaragambyo y’urubyiruko mu matora yo mu kwezi gushize.
Abatavuga rumwe n’ubutegetsi n’imiryango itegamiye kuri leta bavuga ko igipolisi cyishe abantu babarirwa mu magana muri iyo myigaragambyo, imirambo ya benshi igahishwa.
Leta ya Tanzania nta mibare yigeze itangaza imibare y’abishwe cyangwa abakomeretse.
Mu cyumweru gishize, Samia yashyizeho komisiyo yo gukora iperereza kuri iyi midugararo yiciwemo abantu yabaye mu matora.
Perezida Samia yatsinze ayo matora ku majwi 98%, ibyo abatavuga rumwe n’ubutegetsi bwe bise “igisebo kuri demokarasi”.
Gushyira umukobwa we n’umukwe we muri guverinoma nshya birimo kuvugwaho cyane ku mbuga nkoranyambaga mu baturage ba Tanzania no mu karere.
Wanu Hafidh ni muntu ki ?
Wanu Hafidh Ameir wavukiye muri Zanzibar mu 1982, azwi cyane muri Tanzania nk’umukobwa mukuru wa Samia Suluhu na Hafidh Ameir.
Wanu yakurikiye inzira ya nyina, aba umunyaporitike mu ishyaka CCM.Yabaye mu nama y’ubutegetsi y’iri shyaka ku rwego rw’igihugu, umwanya yarimo kuva mu 2010.
Yagiye ahabwa imirimo itandukanye ya poritike, kuva mu 2015 kugera mu 2018, yari umwe mu bagize komisiyo y’amategeko mu nteko ishinga amategeko.
Yabaye umukuru w’urubyiruko mu ishyaka CCM mu gace ko mu majyepfo y’ikirwa cya Zanzibar kuva mu 2008 kugeza mu 2012.
Wanu ni umukuru w’ikigo kitegamiye kuri leta Women’s Initiative Foundation (MIF), akaba ari na we wagitangije mu 2022 muri Zanzibar agamije gufasha kwiga abana bo mu miryango itishoboye.
Kuva mu 2005, Wanu Hafidh w’imyaka 43 ni umudepite uhagarariye ikirwa cya Zanzibar wo mu ishyaka Chama Cha Mapinduzi riri ku butegetsi.
Mu matora yo mu kwezi gushize, Wanu yagaragaye yamamaza nyina ngo atorwe nka perezida, ari na ko na we yiyamamaza ngo yongere atorerwe kuba umudepite.
@BBC
