Urukiko rwa gisirikare mu murwa mukuru Kampala rwarekuye by’agateganyo abantu 17 bo mu ishyaka ritavuga rumwe n’ubutegetsi National Unity Platform rikuriwe na Bobi Wine.
Aba bafunzwe kuva mu kwa 12/2020 bafatiwe mu bikorwa byo kwamamaza umukandida wabo Robert Kyagulanyi uzwi cyane nka Bobi Wine, mu matora yabaye mu kwa mbere.
BBC dukesha iyi nkuru yatangaje ko aba barekuwe barimo abo mu itsinda ry’itangazamakuru rya Bobi Wine, abashinzwe umutekano, n’abashinzwe ‘protocol’. Abo ni bamwe mu bantu bagera kuri 49 bafunzwe bakaregwa gutunga intwaro binyuranyije n’amategeko mu rukiko rwa gisirikare rwa Makyinde i Kampala.
Uru rukiko mbere rwanze inshuro ebyiri ko barekurwa by’agateganyo ruvuga ko bateye inkeke kuri rubanda kuko bashobora guhamagarira urugomo mu gihe igihugu cyari kigiye mu matora.
Uru rukiko ariko rwanze kurekura abandi 18 barimo ushinzwe umutekano bwite wa Bobi Wine witwa Edward Ssebufu uzwi kandi nka Eddie Mutwe, n’umwe mu bo baririmbana umuhanzi Bukeni Ali uzwi nka Nubian Li.
Urukiko ruvuga ko ruzasubiza ku busabe bwabo bwo kurekurwa by’agateganyo mu kwezi gutaha kwa gatandatu.
Jenerali Andew Gutti ukuriye uru rukiko yategetse abarekuwe ko batagomba kurenga umujyi wa Kampala n’akarere ka Wakiso kawukikije.
Buri umwe muri bo yategetswe gutanga ingwate y’agaciro ka miliyoni 50 z’amashilingi ya Uganda (ni agera kuri miliyoni 14 y’u Rwanda) kandi bakajya bitaba urukiko kabiri mu kwezi.
Benjamin Katana, umunyamategeko w’ishyaka National Unity Platform avuga ko abarwanashyaka baryo bagera kuri 97 baregwa ibyaha mu nkiko zitandukanye mu gihugu.
Imvururu zivuye mu kwiyamamaza n’amatora ya perezida zahitanye abantu barenga 50, intsinzi yegukanywe na Perezida Museveni, ariko uruhande rwa Bobi Wine ruvuga ko yaranzwe n’uburiganya.
Iriba.news@gmail.com
