Oxfam yabonye ko umutungo abagabo 10 bakize cyane kurusha abandi binjije muri iki gihe cy’icyorezo uwushyize hamwe ungana na miliyari $540.
Ayo, yaba ahagije kurinda buri muturage w’isi kugwa mu bucyene butewe n’iki cyorezo kuko yagurira urukingo rwa Covid-19 buri muturage w’isi, nk’uko Oxfam ibivuga.
Raporo yayo yabonye ko umutungo w’abatunze za miliyari z’amadorari ku isi ungana n’imari yose hamwe ibihugu bikomeye bigize G20 byashoye mu guhangana n’iyi virusi.
Oxfam irasaba za guverinoma gusuzuma imisoro icibwa abaherwe.
Iyi raporo, biseInequality virus, yatangajwe mu gihe abategetsi bo ku isi bitegura guhurira mu nama ya World Economic Forum isanzwe ibera i Davos, ariko ubu izifashisha ikonabuhanga.
Muri iki cyorezo, amasoko y’imari n’imigabane yazamuye agaciro cyane, bituma umutungo w’abaherwe uzamuka mu gihe ubukungu nyabwo bwo bwari buzahajwe n’ibihe bidasanzwe kuko ubucuruzi n’ingendo byazahaye.
Iyi raporo ivuga ko ku isi yose, umutungo w’abatunze za miliyari z’amadorari wazamutseho tiriyari $3.9 hagati ya tariki 18 z’ukwezi kwa gatatu na 31/12/2020, ubu ukaba ugeze kuri tiriyari $11.95, imari imaze gukoreshwa na leta 20 zikize mu guhangana na Covid-19.
Elon Musk kuva mu ntangiriro z’uyu mwaka niwe muntu ukize kurusha abandi ku isi
Abantu 10 bakize kurusha abandi bo, umutungo wabo wazamutseho miliyari $450 kuva mu kwezi kwa gatatu 2020, barimo Jeff Bezos washinze Amazon, Elon Musk washinze Tesla, na Mark Zuckerberg washinze Facebook.
BBC yatangaje ko Raporo ya Oxfam ivuga ko imari Bezos yinjije kugeza mu kwa cyenda 2020 ashobora guha buri umwe agahimbazamusyi ka $105,000 mu bakozi 876,000 ba Amazon, kandi agakomeza kugira imari ingana n’iyo yari afite mbere y’iki cyorezo.
Ibi bigereranywa n’uko abakene kurusha abandi ku isi bizabafata imyaka irenga 10 kugira ngo bakire neza ingaruka z’iki cyorezo. Oxfam ivuga ko abantu bagera kuri miliyoni 500 ku isi bari kubaho mu bukene kubera iki cyorezo, umubare w’abakennye ku isi ukaba warongeye gusubira uko wari mu myaka 20 ishize.
Danny Sriskandarajah ukuriye Oxfam ishami ryo mu Bwongereza yabwiye BBC ati: “Tubona ko… aya ari amahirwe yo gutekereza ku misoro irimo gushyira mu gaciro ku baherwe, gutekereza ku misoro ku bigo binini, gutekereza ku kuzamura kubona iby’ibanze kuri buri muturage”.
Kuva iki cyorezo cyatangira ibikorwa binini byo kwitanga byagiye biboneka, kuva ku byamamare mu myidagaduro, imikino n’abakuriye za business nini, bagatanga imari mu guhangana na Covid-19.
Mu kwezi gushize, Mackenzie Scott, wahoze ari umugore wa Jeff Bezos, yatangaje ko yatanze arenga miliyari $4 ku bikorwa byo guha ibiribwa abakene, n’ikigega cy’ingoboka mu gihe cy’amezi ane ku Banyamerika.
Jack Dorsey wafatanyije gushinga Twitter, mu kwezi kwa kane 2020 yatangaje ko agiye gutanga miliyari $1 mu kigega cyo gufasha mu kurwana n’ingaruka za Covid-19. Ayo angana na 1/3 cy’umutungo we ubarirwa muri miliyari $3.9
Bill Gates n’umugore we Melinda bemeye gutanga miliyoni $350 ku nkingo, kuvura no gusuzuma iki cyorezo, mu gihe JK Rowling wanditse Harry Potter yatanze miliyoni $1.2 yo gufasha abatagira aho baba n’abantu bakorewe ihohoterwa mu ngo muri iki cyorezo.
Kugeza mu kwa gatandatu umwaka ushize, Jeff Bezos yari amaze gutanga miliyoni $125 mu bikorwa byo kurwanya coronavirus.
iriba.news@gmail.com
