Kuri uyu wa Gatatu Abarundi bazindukiye mu matora y’Umukuru w’Igihugu, imbuga nkoranyambaga zahagaritswe mu gihugu hose ‘internet’ yafunzwe.
Bamwe mu bakoresha imbuga nkoranyambaga nka Whatsapp, Facebook, Twitter na Instagram mu Burundi baravuga ko badashobora kwinjira kuri izo mbuga.
Hari hashize iminsi ibiri binugwanuga ko izo mbuga zishobora kuzahagarikwa kuri uyu munsi w’amatora tariki ya 20 Gicurasi 2020.
BBC dukesha iyi nkuru yabwiwe numwe mu banyamakuru ko kuba izi mbuga zahagaritswe birimo kwica akazi by’umwihariko ku banyamakuru.
Kugeza ubu ntacyo Leta iratangaza ku bijyanye no guhagarika ikoreshwa ry’imbuga nkoranyambaga.
Covid-19 yabereye inkomyi indorerezi
Itsinda ry’indorerezi zagombaga koherezwa n’Umuryango w’Afurika y’Iburasirazuba zananiwe kujya gukurikirana aya matora kubera icyorezo cya Covid -19. Aya matora ubu arimo gukurikiranwa n’indorerezi zaturutse mu mashyirahamwe amwe namwe yo hagati mu gihugu nka Mac, Fontaine Isoko, CECAB n’ayandi.
Ku biro by’amatora hari n’abahagarariye abakandida biyamamaza ku mwanya w’umukuru w’igihugu. Abenshi bakaba ari abahagarariye amashyaka ya CNDD-FDD, CNL na Uprona, n’aho uyu wa nyuma hari aho utaboneka, aho ni nko mu biro by’itora biri kw’ishuri shingiro rya ECOFO Buye, ya komine Mwumba mu ntara ya Ngozi.
Coronavirus
Abanyamakuru bavuga ko ahenshi abaturage barimo gukurikiza amabwiriza yo kwirinda baja gutora bisabwa mu kwikingira icyorezo cya Covid-19, ariko kandi hari ahandi bigora, aho ni nko mu makomine amwe namwe y’intara ya Bujumbura aho usanga nta mazi yo gukaraba ahari, ahandi ugasanga abantu baramukanya ntacyo bikanga, guhana intera hagati y’umuntu nundi nabyo ku biro byinshi by’itora ntibirimo kubahirizwa.
Iriba.news@gmail.com
