Image default
Mu mahanga

Donald Trump n’umugore we Melania babasanzemo Coronavirus

Perezida wa Leta zunze ubumwe za Amerika Donald Trump yatangaje ko we n’umugore we Melania Trump babasanzemo coronavirus kandi ubu bagiye mu kato.

Trump w’imyaka 74 yatangaje aya makuru kuri Twitter. Yanditse ati: “Ibi tuzabivamo hamwe”.

Ibi ni nyuma y’uko bamwe mu bakorana nawe bya hafi babasanzemo iki cyorezo.

Hope Hicks, umujyanama we w’imyaka 31, niwe muntu wa hafi cyane bakorana baheruka gusangamo Coronavirus.

Madamu Hicks yajyanye nawe mu ndege ya Air Force One ubwo muri iki cyumweru yari agiye mu kiganiro mpaka cyabereye muri leta ya Ohio.

Sean Conley, umuganga wa Trump yasohoye itangazo rivuga ko perezida n’umugore we “bombi ubu bameze neza, kandi bagiye kuguma mu rugo muri White House kugira ngo bakire”.

Iri tangazo rikomeza rivuga ko uyu muganga yizeye ko “perezida ari bukomeze gukora inshingano ze nta kirogoya mu gihe ari gukira, kandi nzakomeza kubaha amakuru y’uko bizagenda”.

Mu kiganiro kuri telephone kuri Fox News kuwa kane nijoro, Trump yavuze ko we na Melania “bamara igihe kinini bari kumwe na Hope”.

Ubusanzwe, buri munsi ibiro bya White House bisuzuma uwundi muntu wese uba uri bubonane na perezida.

Kuwa kane nijoro,Trump yari yavuze ko we n’umugore we, w’imyaka 50, bagiye kwishyira mu kato nyuma y’uko Madamu Hope bamusanzemo iyi ndwara.

Yari yanditse nabwo kuri Twitter ati: “Hope Hicks, umaze igihe akora cyane ataruhuka na gato, bamusanzemo Covid-19. Birakomeye!

“First Lady nanjye dutegereje ibisubizo. Hagati aho turaba dutangiye kujya mu kato!

Trump siwe mutegetsi wa mbere ku isi wanduye iki cyorezo.

Mu ntangiriro z’uyu mwaka, Minisirtiri w’intebe w’ubwongereza Boris Johnson yarayanduye, Perezida Jair Bolsonaro wa Brazil nawe yaje kuyandura. Bombi barayikize nubwo Johnson we yageze aho imumerera nabi akaremba ndetse agafashwa guhumeka.

Icyumweru kimwe nyuma y’uko Donald Trump asabye Abanyamerika kudaterwa ubwoba na Covid-19 kuko “urebye nta muntu igira icyo itwara” uretse abashaje n’abafite indwara z’umutima, ubu nawe iyi virus yamugezeho.

Biragoye kwirengagiza ko iyi ari inkuru itigisa isi, iminsi 32 gusa mbere y’amatora ya perezida wa Amerika.

Trump biramusaba kujya mu kato kugira ngo avurwe. Ibikorwa byo kwiyamamaza birahagaze. Ikiganiro mpaka kiri mu byumweru bibiri ubu kiribazwaho.

Mu minsi ibiri ishize, mu kiganiro mpaka, Trump yacishije bugufi mukeba we Joe Biden ko ahora yambaye agapfukamunwa kandi adakora ibikorwa byo kwiyamamaza bingana nawe.

Ubu, White House n’abashinzwe kumwamamaza bagomba gusobanura impamvu baretse perezida ntafate ingamba zikwiriye zo kwirinda – ndetse n’abandi bo muri leta ye bashobora kuba baranduye.

Mu bihe by’amage mu gihugu, abaturage ba Amerika ubusanzwe bajya ku ruhande rwa perezida bakifatanya nawe. Gusa bishobora kuba atari uko biri bugende ubu. Ntibiramenyekana neza niba kuba Bwana Trump bamusanzemo iki cyorezo bizahungabanya ikiganiro mpaka cya kabiri giteganyijwe tariki 15 z’uku kwezi i Maimi muri leta ya Florida.

Leta zunze ubumwe za Amerika nicyo gihugu cyazahajwe na Covid-19 kurusha ibindi ku isi, abantu bagera kuri miliyoni 7.2 barayanduye naho abarenga ibihumbi 200 irabica

Trump yanenzwe n’abatavuga rumwe nawe kudafata ingamba zikomeye zo kurwanya iki cyorezo no kugifata nk’icyoroshye, ibyo we yahakanye. Kenshi yabonetse atambaye agapfukamunwa.

Kuva yaboneka ku isi mu ntangiriro z’uyu mwaka, abantu barenga miliyoni 34 babasanzemo Covid-19, abarenga miliyoni imwe yarabishe, nk’uko bivugwa na kaminuza ya Johns Hopkins yo muri USA.

Related posts

Kuko ndi umugore hari abashidikanyaga ko nategeka-Samia Suluhu

Emma-Marie

Mozambique: Intagondwa zirimo ‘guca imitwe y’abana’

Emma-Marie

USA: ‘Icyumba Byabereyemo’ igitabo Perezida Trump ahanganye nacyo ngo kidasohoka

Emma-marie

Leave a Comment

Skip to toolbar