Isi ikwiye kwitegura ko Coronavirus ishobora kuba icyorezo- OMS
Ishami ry’umuryango w’abibumbye ryita ku buzima ‘OMS’ ryatangaje ko isi ikwiye kwitegura ko coronavirus ishobora kuba icyorezo nubwo hakiri kare ko yitwa icyorezo , ariko ko bikwiye kuba mu cyiciro cyo kwitegura.
Abandi bantu bashya banduye iyo virusi, itera indwara yo mu myanya y’ubuhumekero izwi ku izina rya Covid-19, bakomeje kugaragara, ndetse abari kugaragara muri Koreya y’Epfo, Ubutaliyani na Iran bakaba bari gutera impungenge.
IInkuru dukesha Aljazeera ivuga ko benshi mu bamaze kuyandura ari abo mu Bushinwa, aho ubu bwoko bushya bwa coronavirus bwagaragaye bwa mbere mu mwaka ushize, hakaba hari abantu barenga 77,000 bayirwaye naho abarenga 2,600 ikaba imaze kubica.
Abantu barenga 1,200 bamaze kwemezwa ko bayirwaye mu bindi bihugu bigera hafi kuri 30 ndetse abantu 20 imaze kubahitana.
Ejo ku wa mbere, Ubutaliyani bwatangaje ko abantu bane bandi yabahitanye, bituma umubare w’abo imaze kwica kugeza ubu muri icyo gihugu ugera kuri barindwi.
Amasoko y’imari n’imigabane yo ku isi yagiye ku kigero cyo hasi cyane kubera impungenge z’ingaruka ku bukungu z’iyo virusi.
Ikigero cy’abarwayi bayirwaye bari gupfa kubera iyo ndwara izwi nka Covid-19 kigaragara nk’ikiri hagati ya 1% na 2%, nubwo OMS ivuga ko ikigero cy’abo yica kitaramenyekana.
Ejo ku wa mbere, Iraq, Afghanistan, Kuwait, Oman na Bahrain byatangaje abantu ba mbere byemeje ko bayirwaye, bose bahageze bavuye muri Iran. Abategetsi bo muri Bahrain bavuze ko umurwayi wayanduye waho ari umushoferi wa bisi itwara abanyeshuri, kandi ko amashuri menshi yafunzwe kubera iyo mpamvu.
Imwe mu mikino yo mu gihe kiri imbere muri shampiyona y’umupira w’amaguru mu cyiciro cya mbere mu Butaliyani, Serie A, ndetse n’iyo mu irushanwa rya Europa League izakinwa nta bafana bari ku kibuga mu kwirinda ikwirakwira ry’iyo virusi, nkuko byatangajwe na minisitiri w’imikino w’Ubutaliyani.
Koreya ya ruguru yashyize mu kato abanyamahanga 380 mu rwego rwo gukumira coronavirus.
OMS yatangaje iki?
Mu kiganiro n’abanyamakuru ku munsi w’ejo ku wa mbere, Tedros Adhanom Ghebreyesus, umukuru wa OMS, yavuze ko umubare w’abantu bashya banduye coronavirus mu minsi ishize muri Iran, Ubutaliyani na Koreya y’Epfo “uteye impungenge mu buryo bukomeye”.
IRIBA NEWS
