Uwabaye Perezida wa Misiri, Hosni Mubarak, akaza kweguzwa n’igisirikare mu 2011 kubera imyigaragambyo y’abaturage yapfuye afite imyaka 91 y’amavuko.
Hosni Mubarak yategetse Misiri imyaka 30 aza gukurwa ku butegetsi mu myigaragambyo y’abaturage, mu ruhererekane rw’imyigaragambyo yabaye mu bihugu by’Abarabu.
Amaze guhirikwa ku butegetsi yatawe muri yombi, ashinjwa kugira uruhare mu bwicanyi bwakorewe abari mu myigaragambyo yo kumuhirika ku butegetsi. Mu mwaka wa 2017 akaba yahanaguweho ibyaha ararekurwa.
Inkuru dukesha VOA ivuga ko urupfu rwe rwatangajwe na Televiziyo ya Misiri, nyuma y’uko ikinyamakuru gikorera ku mbuga nkoranyambaga kitwa Al-Watan cyari cyatangaje ko yapfiriye mu bitaro bya gisirikare, kuwa gatandatu w’icyumweru gishize umuhungu we Alaa yari yavuze ko se ari kuvurirwa mu bitaro by’indembe.
Mubarak yavutse mu 1928, yinjiye igisirikare akiri umusore aho yagize uruhare rukomeye mu ntambara yo mu 1973 hagati y’Abarabu n’igihugu cya Isirayeli. Yabaye perezida wa Misiri 1981 nyuma y’urupfu rwa Perezida Anwar Sadat.
Yagize kandi uruhara rukomeye mu biganiro by’amahoro hagati ya Palestina na Isirayeli. Ku butegetsi bwe, igisirikare cya Misiri cyabonye amamiliyari menshi y’amadorari, ariko ubushomeri, ubukene hamwe na ruswa bihabwa intebe.
