Inzego zishinzwe ubuzima mu Karere ka Musanze zihamya ko kuba icyorezo cya Covid-19 cyaragabanije ubukana byatewe n’uko umubare munini w’abaturage wikingije inkingo zose bityo ngo “abatarikingije babayeho mu buzima bw’abayikingije” nabo bakwiye kwihutira kwikingiza.
Imibare itangazwa n’inzego zishinzwe ubuzima mu Karere ka Musanze, igaragaza ko abaturage bamaze gufata urukingo rwa mbere rwa Codi-19 ari 386.094 bangana na 84.5%, abamaze kwikingiza urwa kabiri ni 336.864 (73.7%) , mu gihe 13.308 (2.9%) bakingiwe urukingo rwa kabiri, naho abageze mu zabukuru bahawe urukingo rwa kane bagera kuri 1.033.
Umuganga ushinzwe gukurikirana indwara zandura mu Karere ka Musanze, Ndererimana Olivier, mu kiganiro yahaye abanyamakuru bibumbiye mu ishyirahamwe ry’abanyamakuru barwanya Sida n’izindi ndwara (Abasirwa) tariki 7 Kamena 2023 yavuze ko umuhate abaturage bagize mu kwikingiza Covid-19 wagize uruhare mu gutuma iki cyorezo kigabanya ubukana.
Yaravuze ati “Mu Karere ka Musanze, abaturage bitabiriye igikorwa cyo kwikingiza ku buryo bushimishije byatumye icyorezo kigabanya ubukana. n’ubwo bimeze bityo ariko hari umubare muto w’abandi binangiye kubera impamvu zabo bwite[…] navuga ko ubu abatarikingije covid-19 babayeho mu buzima bw’abayikingije nabo bakwiye kwihutira kwikingiza kuko urukingo rwagize uruhare rukomeye mu guca intege virus. Ikindi nababwira nuko kwikingiza bitabuza umuntu kwandura gusa iyo wanduye virus ntigira ubukana kimwe n’ubwo igira ku muntu utarikingije.”
Covid yagabanyije ubukana ariko ntaho yagiye
Umuyobozi w’Akarere ka Musanze wungirije ushinzwe imibereho myiza y’abaturage, Kamanzi Axelle, asaba abaturage batarikingiza Covid-19 kwihutira kwikingiza kuko ari ubuntu, abakingije urukingo rumwe nabo bakibuka gufata urwa kabiri ndetse no kwishimangiza kuko n’ubwo icyorezo cyagenjeje amaguru macye ntaho cyagiye.
Yagize ati “Ejo hashize twabonye abantu babiri bafite ubwandu bwa Covid 19 […] Ubukana bwa virus bwari buhari mu myaka yashize sibwo buhari ubu, ariko abaturage tubibutsa gukomeza kwirinda, cyane ko nabo babonye neza ububi bwayo. Nk’ubuyobozi natwe dukomeza kubibutsa ko covid igihari bagomba gukomeza kwikingiza kubatarabikora.”
Magingo aya igikorwa cyo gukingira Covid-19 mu Karere ka Musanze kirarimbanije, nyuma yo gukingira abakuze ubu hari gukingirwa abana bari hagati y’imyaka 5 -11, abamaze gukingirwa urukingo rwa mbere bagera kuri 68421, urwa kabiri basaga ibihumbi 40.
Kuva icyorezo cya Covid -19 cyagera mu Rwanda mu 2020, abayanduye mu Karere ka Musanze bagera ku 7,230 abo yishe ni 69 mu gihe abishwe n’iki cyorezo mu Rwanda basaga 1000.
Yanditswe na Emma-Marie Umurerwa
emma@iriba.news.com
