Gereza ya gisirikare ya N’dolo muri Repubulika ya Demokarasi ya Congo yatangaje ko imfungwa 43 zemejwe ko zanduye icyorezo cya coronavirus, abategetsi ba gereza n’abo mu rwego rw’ubuvuzi bakaba bari gukumira ko izindi mfungwa zakwandura.
Prof. Steve Ahuka ukuriye ibikorwa by’ubutabazi muri DR Congo, yabwiye BBC ko hari kurebwa uburyo bwo guhagarika ubwandu muri iyo gereza iri mu murwa mukuru Kinshasa.
Yagize ati”Turi gutekereza ku gushyira amahema mu mbuga ya gereza mu rwego rwo kwita ku bantu banduye ndetse no guhumanura ahantu handuye”.
Yanavuze ko hakomeje gukorwa iperereza ngo harebwe niba hari abandi banduye.
Kuva ku itariki ya 10 y’ukwezi kwa gatatu uyu mwaka, muri DR Congo hamaze kwemezwa abantu 604 barwaye Covid-19, indwara yo mu myanya y’ubuhumekero iterwa n’ubu bwoko bushya bwa coronavirus.
96% by’abo babwayi bose babonetse i Kinshasa, umujyi wahindutse indiri y’iyi ndwara muri icyo gihugu. Muri abo 32 imaze kubica naho 75 barayikize.
