Perezida wa Tanzania Samia Suluhu avuga ko hamwe na hamwe yitwaye neza mu kuyobora igihugu kurusha ba perezida b’abagabo bamubanjirije.
Samia yavuze ko yahuye n’imbogamizi zo kutagirirwa icyizere mu minsi ya mbere y’ubutegetsi bwe kubera ko ari umugore – imbogamizi avuga ko yashoboye guhangana na zo.
Yabivugiye mu ihuriro ryo mu murwa mukuru Accra wa Ghana, mu ruzinduko rwa mbere agiriye muri Afurika y’uburengerazuba kuva yaba Perezida mu 2021, nyuma y’urupfu rw’uwo yasimbuye John Magufuli.
Muri icyo kiganiro cyo mu nama ngarukamwaka ya banki y’iterambere y’Afurika, Samia yagize ati: “Byari bigoye cyane gutuma Abanya-Tanzania bangirira icyizere. Ko nashobora kuyobora igihugu mu buryo bumwe n’uko abagabo bakiyobora – iyo ni yo yari ingorane ikomeye”.
Yongeyeho ati: “Mu gihe cy’umwaka umwe nerekanye ubushobozi bw’abagore, nayoboye igihugu nkuko abagabo bakiyoboye ndetse hamwe na hamwe nakiyoboye neza kubarusha”.
Ubu Samia ni we Perezida wenyine w’umugore muri Afurika – umwanya wa Perezida muri Ethiopia, ufitwe n’umugore, ahanini ni umwanya w’umuhango gusa kuko ububasha muri politiki ari ubwa Minisitiri w’intebe.
Samia yabwiye iryo huriro rya banki y’iterambere y’Afurika ko kwiyongera kw’ubukungu bwa Tanzania kwari kwaragabanutse kuva kuri 6.4% kugera kuri 4% mu gihe cy’icyorezo cya Covid, ariko ko ku butegetsi bwe ubukungu bwiyongereye kuri 5.2%.
Samia yongeyeho ko biteganyijwe ko ubukungu bwa Tanzania buziyongera ku kigero cya 6.7% mu 2025.
Iryo huriro ry’i Accra ryari ryanitabiriwe na Perezida wa Ghana Nana Akufo-Addo, Perezida wa Mozambique Filipe Nyusi na Perezida w’ibirwa (amazinga mu Kirundi) bya Comores Azali Assoumani.
Kuri uyu wa gatatu, Samia arahabwa igihembo cy’uyu mwaka yegukanye mu kwezi gushize cyitwa ‘Africa Road Builders-Babacar Ndiaye Trophy’, gitangwa na banki y’iterambere y’Afurika, ku mutegetsi wagaragaje umuhate wo guteza imbere ibikorwa-remezo by’ubwikorezi muri Afurika.
@BBC
