Minisiteri y’Ubuzima iratangaza ko kuri uyu wa gatandatu tariki 18 Nyakanga 2020 mu Rwanda umuntu wa gatanu yishwe na COVID-19. Uwo ni umukecuru w’imyaka 88 wo mu Karere ka Nyamasheke.
Minisiteri y’Ubuzima kandi yatangaje ko kuri uyu wa Gatandatu habonetse abarwayi bashya 54 banduye COVID-19.
Abo barwayi 54 babonetse mu bipimo 3,232, abamaze kuboneka mu Rwanda banduye icyo cyorezo bose hamwe baba 1,539.
Minisiteri y’Ubuzima yasobanuye ko abo barwayi bashya 54 barimo 35 babonetse muri Nyamasheke (utugari turi mu kato), icyenda babonetse muri Rusizi, barindwi babonetse muri Kigali, na batatu babonetse muri Kirehe.
Abantu umunani mu bari barwaye bakize kuri uyu wa Gatandatu, abamaze gukira bose hamwe baba 819, naho abakirwaye ni 715.
Abamaze kwicwa n’icyo cyorezo mu Rwanda ni batanu. Minisiteri y’Ubuzima isaba Abaturarwanda bose gukomeza kwitwararika bubahiriza amabwiriza yo kwirinda ikwirakwira ry’icyorezo cya COVID-19.
