Image default
Amakuru

Coronavirus: Abavuye mu Rwanda n’u Burundi babujijwe kujya muri UK

U Burundi, u Rwanda na Emira zunze ubumwe z’Abarabu nabyo byongewe ku rutonde “rutukura” rw’ibihugu aho abagenzi babivuyemo cyangwa babiciyemo batemerewe kujya mu Bwongereza.

Iki cyemezo kigamije guhagarika ikwirakwira ry’ubwoko bwa coronavirus bwabonetse bwa mbere muri Africa y’Epfo, kirashyirwa mu bikorwa kuva uyu munsi kuwa gatanu saa cyenda ku isaha yo mu Burundi no mu Rwanda.

BBC yatangaje ko Ubutegetsi bw’u Rwanda n’u Burundi ntacyo buratangaza ku mwanzuro w’Ubwongereza, ndetse mu makuru butanga ntiburemeza niba ubu bwoko bw’iki cyorezo bwarahageze. Minisitiri ushinzwe ubwikorezi mu Bwongereza Grant Shapps yatangaje kuri Twitter ko abaturage b’Ubwongereza batashye ari bo bemerewe kuhagera bafite icyemezo ko batanduye kandi nabwo bakabanza kujya mu kato mu minsi 10.

Ubwongereza ntibusobanura niba muri ibi bihugu bitatu harageze ubwo bwoko bushya bwa coronavirus, muri aka karere bumaze kuboneka muri Kenya kugeza ubu.

Mu Rwanda, kuwa kabiri uraha nibwo hazashira ibyumweru bibiri umurwa mukuru Kigali uri mu bihe bidasanzwe bya ‘guma mu rugo’, mu gushaka guhangana n’inkubiri ya kabiri ya coronavirus.

Muri uku kwezi kwa mbere gusa, coronavirus yishe hafi ya kimwe cya kabiri cy’abo imaze kwica bose 186 kuva yagera mu Rwanda mu kwezi kwa gatatu umwaka ushize.

Kugeza ubu kandi hejuru ya kimwe cya gatatu cy’abanduye bose hamwe 14,529 nabo babonetse muri uku kwezi.

U Rwanda rushyirwa na bimwe mu bigo by’ubushakashatsi mu bihugu bihagaze neza mu kurwanya coronavirus.

Mu ntangiriro z’uku kwezi, u Burundi bwatangaje ingamba zo gufunga imipaka yo kubutaka no ku mazi mu kwirinda ikwirakwira ry’iki cyorezo, mu Burundi hamaze kuboneka abayanduye barenga gato 1,000.

Mu Burundi muri uku kwezi nibwo abantu bategetswe kwambara udupfukamunwa mu gihe bari bagiye gutega imodoka rusange.

Muri aka karere, u Rwanda n’u Burundi byiyongereye kuri Tanzania na DR Congo nabyo Ubwongereza bwafatiwe ingingo nk’iyi muri uku kwezi. Ubwongereza ni igihugu cya gatanu ku isi kizahajwe n’iki cyorezo aho kimaze kwica abantu barenga 100,000 n’abacyanduye barenga miliyoni eshatu.

iriba.news@gmail.com

Related posts

Bakuriwemo inda bibagarurira icyizere cyo kugera ku nzozi zabo

Emma-Marie

Abigaga mu mashuri makuru yafunze barabyitwaramo bate?

Emma-marie

Ndayisenga ucyekwaho gutwika Cathédrale y’ i Nantes ntazwi mu muryango w’abanyarwanda baba mu Bufaransa

Emma-marie

Leave a Comment

Skip to toolbar