Image default
Amakuru

Coronavirus: Bwa mbere urukingo rwayo rugiye kugeragezwa muri Africa

Kaminuza ya Wits y’i Johannesburg muri Afurika y’Epfo uyu munsi yatangaje ko igerageza rya mbere ry’urukingo rwa coronavirus muri iki gihugu, ari naryo rya mbere muri Afurika, ritangira. Abantu ba mbere baraterwa urwo rukingo muri iki cyumweru.

Uru rukingo ruri mu igerageza, abahanga barwise ChAdOx1 nCoV-19, barukoze muri virusi yitwa ChAdOx1, bari kureba niba rushobora gukingira umubiri w’umuntu Covid-19.

Muri Afurika y’Epfo abantu 80,000 bamaze kwandura iki cyorezo, muri bo 1,674 yarabishe

Profeseri Shabir Madhi, umuhanga mu by’inkingo wo muri Kaminuza ya Wits ni we uyoboye igerageza ry’uru rukingo muri Afurika y’Epfo, ubushakashatsi bafatanyijemo na Kaminuza ya Oxford yo mu Bwongereza hamwe n’ikigo Oxford Jenner Institute cyarukoze.

Madhi avuga ko batangiye gusuzuma abo bazakoreraho igerageza mu cyumweru gushize. Ati: “Aba mbere baraterwa uru rukingo muri iki cyumweru”.

BBC dukesha iyi nkuru yatangaje ko ishami rya ONU rishinzwe ubuzima ku isi OMS rivuga ko nta muti cyangwa urukingo by’iki cyorezo biraboneka kugeza ubu.

Mbere y’uko iri gerageza ritangira, abagiye kurikora bavuga ko uru rukingo rwabanje kugenzurwa no kwemezwa n’ikigo cya leta ya Afurika y’Epfo gishinzwe kwemeza ibikoreshwa mu gihugu.

Uru rukingo rwamaze guterwa abantu 4,000 mu igeragezwa mu Bwongereza, ruri kugeragezwa kandi no muri Brazil.

Bavuga ko bateganya gukora igerageza ryarwo ryagutse ku bantu 30,000 muri Leta Zunze Ubumwe za Amerika.

bashakashatsi bakoze uru rukingo bavuga ko bimwe mu birugize (antibodies) byagaragaje – mu isuzumwa ryo muri ‘laboratoire’ – ko bishobora kwica iyi virusi.

Bavuga ko bizeye ko nirugera mu mubiri w’umuntu ruzabasha kuwuha ubudahangarwa imbere ya virusi ya SARS-CoV-2 igera mu mubiri w’umuntu igatera indwara ya Covid-19.

Abari gukora iri gerageza bavuga ko izi nkingo zigaragaza ko nta ngaruka zigira, nubwo zishobora gutera guhinda umuriro, kuribwa umutwe no kubabara akaboko by’igihe gito.

Mu kwezi gushize, aba bashakashatsi basabye leta ya Kenya ko uru rukingo rugeragezwa ku bantu 400, inzego zibishinzwe muri Kenya ntiziremeza ko igeragezwa ritangira.

Ahatandukanye ku isi hari gukorwa inkingo zirenga 100 za Covid-19.

Related posts

Uburyo bushya bwo kurinda abana Malaria buratanga icyizere

NDAHIRIWE JB

Waruziko uruhara rushobora kwirindwa ?

Emma-marie

Ikibazo cy’ibiciro by’ingendo bihanitse cyagejejwe kuri Minisitiri w’Intebe

Emma-marie

Leave a Comment

Skip to toolbar