Kaminuza y’ubushakashatsi ya Johns Hopkins ivuga ko abanduye coronavirus ku isi uyu munsi kuwa kabiri barenze miliyoni umunani (8) mu gihe abo imaze kwica ari 437,137.
Mu Rwanda mu minsi irindwi ishize habonetse abarwayi bashya banduye coronavirus 161, bituma leta itangaza ko iri gusuzuma niba hatasubizwaho ingamba zikomeye zo kwirinda zari zarafahwe mbere.
Mu Burundi, leta ejo kuwa mbere yatangaje ko habonetse abantu bashya 10 bayanduye, imibare yose hamwe muri iki gihugu imaze kuba 104, hamaze gufatwa ibipimo birenga gato 1,000 nk’uko biboneka mu bitangazwa na ministeri y’ubuzima.
Mu Burundi, nta ngamba zigaragaza zikomeye zafashwe mu kwirinda ikwirakwira ry’iki cyorezo.
Beijing icyorezo gishya ‘kirakomeye cyane’
BBC dukesha iyi nkuru iravuga ko icyorezo kigarutse bushya cya coronavirus i Beijing ‘kirakomeye cyane’, bityo hagiye ‘gufatwa ingamba zikomeye’ mu kikirwanya nk’uko umuvugizi wa guverinoma y’uyu mujyi yabibwiye abanyamakuru.
Abaturiye agace iyi ndwara yongeye kubonekamo babujijwe kuva mu mujyi wa Beijing, imodoka zitwara abantu ubu ntizemerewe kuva muri uyu mujyi.
Hari gupimwa abantu bose bageze mu isoko riranguza ryabonetsemo iyi virus mu minsi micye ishize.
Nubwo imibare y’ubwandu bushya ikiri hasi abategetsi bavuga ko bari kugerageza gukumira ngo idakwirakwira bikaba ngombwa ko bafunga uyu mujyi w’abaturage miliyoni 20.
Nigeria na gahunda y’imyaka itatu yo kurwanya Covid-19
Leta ya Nigeria ivuga ko iri gutegura gahunda y’imyaka itatu yo kurwanya iki cyorezo, ivuga kandi ko hakiri kare cyane gufungura amashuri n’ahandi hantu hahurira abantu benshi.
Muri Nigeria habarwa abantu barenga 16,000 banduye coronavirus.
Minisitiri w’ubuzima w’iki gihugu yabwiye abanyamakuru ko iki cyorezo “tuzabana nacyo igihe kirekire kandi tuzagenda twiga uko iminsi igenda iza”.
Magufuli yategetse ko ‘byose bisusubira nka mbere’
Perezida John Magufuki wa Tanzania kuri uyu wa mbere yatangarije mu nteko ishinga amategeko ko amashuri yose (n’ayari atarafungura) agomba gufungura tariki 29 z’uku kwezi kwa gatandatu.
Bwana Magufuli yavuze ko ibikorwa byose by’ubuzima busanzwe n’ubucuruzi byari byarahagaritswe kubera Covid-19 bigomba gusubira nk’uko byahoze mbere.
Shampiyona y’umupira w’amaguru muri iki gihugu yari yarasubitswe, ikaba iherutse gusubukura n’abafana bajya ku bibuga.
Ukraine: Umugore wa Perezida ari mu bitaro
Umugore wa Perezida wa Ukraine yashyizwe mu bitaro kubera coronavirus.
Byatangajwe mu cyumweru gishize ko Madamu Olena Zelensky w’imyaka 42, yanduye iki cyorezo ariko ko umugabo we Volodymyr n’abana babo babiri batanduye.
Uyu munsi kuwa kabiri ibiro by’umukuru w’igihugu byatangaje ko Madamu Olena yajyanywe mu bitaro “aho ari kwitabwaho n’abaganga”.
Mu cyumweru gishize, imibare y’abandura muri Ukraine yongeye kuzamuka nyuma y’uko nyinshi mu ngamba zari zafashwe zorohejwe.
Bangladesh: Abarwayi birirukanwa n’ibitaro
Imibare y’abanduye muri Bangladesh irakomeza kwiyongera mu gihe ibitaro bitandukanye muri iki gihugu bisubiza inyuma abarwayi kuko bitagishoboye kubakira.
Hari ubwoba ko iki gihugu gituwe mu bucucike bukomeye gishobora kuba izingiro rishya rya Covid-19.
Uyu munsi habonetse abatu bashya hafi 4,000 banduye, mu gihe bose hamwe basatira 95,000 mu gihugu.
Muri iki gihugu hari ubucye bw’ibitanda bishobora kwakira indembe, n’ibyuma bifasha guhumeka.
Havugwa ibitanda byakira abarwayi mu bitaro birenga gato 1,000 mu gihugu cyose, gituwe n’abaturage miliyoni 160.
Inkuru z’abarwayi basubizwa inyuma n’ibitaro nizo ziganje ubu muri iki gihugu.
Se wa Ilhan Omar yishwe n’iyi virus
Ilhan Omar umugore wavukiye muri Somalia uri mu bagize inteko ishinga amategeko ya Amerika yatangaje urupfu rwa se kubera Covid-19.
Madamu Omar yazanye na se, Nur Mohamed, nk’impunzi muri Amerika mu 1995 bavuye mu nkambi y’impunzi muri Kenya.
Ni umwe mu bagore bambere b’abasilamu batowe kujya mu nteko ya Amerika.
Abanduye bakomeje kwiyongera cyane mu Buhinde
Ubu hashize icyumweru Ubuhinde bworoheje ingamba za ‘guma mu rugo’ ariko imibare yaratumbagiye.
Hashize iminsi itatu habarurwa abanduye bashya 11,000 buri munsi nk’uko bivugwa na kaminuza ya Johns Hopkins.
Ubuhinde, ni igihugu cya kane ku isi gifite abanduye benshi, mu murwa mukuru New Delhi aho ubwandu buri kuzamuka, haravugwa inkuru z’ibitaro biri gusubiza inyuma abarwayi kuva mu cyumweru gishize.
Ibihugu bitanu ubu (16/06/2020) bifite abanduye benshi (imibare ya Johns Hopkins University)
- USA: 2,114,026
- Brazil: 888,271
- Uburusiya: 544,725
- Ubuhinde: 343,091
- Ubwongereza: 298,315
Mu karere:
- Congo – Kinshasa: 4,837
- Kenya: 3,727
- Ethiopia: 3,521
- Somalia: 2,642
- Sudani y’Epfo: 1,693
- Uganda: 705
- Rwanda: 612
- Tanzania: 509 (+66)
- Burundi: 104
