Polisi y’Ubushinwa na polisi y’Afurika y’epfo zafashe doze zibarirwa mu bihumbi z’inkingo mpimbano za Covid-19 ndetse zita muri yombi abantu babarirwa muri za mirongo, nkuko polisi mpuzamahanga Interpol ibivuga.
Mu Bushinwa, polisi yataye muri yombi abantu 80 ku ruganda bivugwa ko rukora inkingo mpimbano, ahasanzwe doze zitari munsi ya 3,000.
Abashinwa batatu n’umuntu umwe ukomoka muri Zambia bafungiwe mu nzu y’ububiko mu ntara ya Gauteng muri Afurika y’epfo ahasanzwe amacupa yo mu birahure arimo doze 2,400.
Ntabwo bizwi neza igihe abo bantu baterewe muri yombi. Mu itangazo Interpol yatangaje ku wa gatatu, yavuze ko irimo kwakira andi makuru avuga ko matsinda akora inkingo mpimbano za Covid-19.
BBC yatangaje ko iryo vumburwa ry’inkingo mpimbano za Covid-19 muri Afurika y’epfo ryatangajwe n’ikinyamakuru Sunday Times cyo muri icyo gihugu mu mpera y’ukwezi kwa cumi na kabiri.
Interpol, ifite icyicaro i Lyon mu Bufaransa, ituma habaho ubufatanye bwa polisi ku isi mu guhashya ibyaha.
Ku isi abantu barenga miliyoni 115 bamaze gutangazwa ko banduye coronavirus, muri bo abarenga miliyoni 2,5 yarabishe, nkuko imibare yakusanyijwe na Kaminuza ya Jonhs Hopkins yo muri Amerika ibigaragaza.
Ubwo Interpol yatangazaga isenywa ry’iryo tsinda ricyekwaho gukora inkingo mpimbano za Covid-19, yavuze ko nta nkingo zemewe za Covid-19 “kuri ubu zicuruzwa ku mbuga za internet”.
Interpol yongeyeho iti: “Urukingo urwo ari rwo rwose rwamamazwa ku mbuga za internet… ntabwo ruzaba rwemewe n’amategeko, ntabwo ruzaba rwarageragejwe kandi rushobora gushyira ubuzima mu kaga”.
Inkingo ni ingenzi mu guhangana n’iki cyorezo cya coronavirus, kandi hari irushanwa rikomeye ku isi mu kugura doze ziriho, nyuma yuko mu mezi ya vuba ashize umubare w’izemejwe n’abategetsi mu rwego rw’ubuvuzi wakomeje kwiyongera.
