Image default
Amakuru

Musanze:Abapadiri babiri bahaniwe kutubahiriza amabwiriza yo kwirinda Covid-19

Kuri iki cyumweru tariki ya 11 Ukwakira nibwo Polisi ikorera mu ntara y’Amajyaruguru yakoze igikorwa cyo kugenzura ko amadini n’amatorero bikorera muri iyi ntara byubahiriza amabwiriza yo kwirinda ikwirakwira rya COVID-19 mu gihe bari mu mihango y’amasengesho.

Iki gikorwa cyabereye mu turere twose twegereye umujyi wa Musanze.

Ni muri urwo urwego Polisi yaje gusanga muri Shapeli ya Kiliziya gaturika Cathedral ya Ruhengeri iherereye mu Karere ka Musanze harimo abasaza n’abakecuru bashyizwe ukwabo muri iyo Shapeli barimo guhabwa igitambo cya misa na Padiri Nsengiyumva Felicien. Ni mugihe hari irindi tsinda ryari muri kiriziya nini risomerwa na Padiri mukuru wa katederali ya Musanze, Padiri Ndagijimana Emmanuel.

Umuyobozi wa Polisi mu ntara y’Amajyaruguru, Assistant Commissioner of Police (ACP) Reverien Rugwizangoga yavuze ko mu nsengero zigera kuri 72 hariya kuri katederali ya Ruhengeri niho honyine batari bubahirije amabwiriza yo kurwanya COVID-19.

Yagize ati “Mu nsengero zirenga 72 twakoreye igenzura mu Karere ka Musanze, Gakenke, Gicumbi na Burera, muri katederale ya Ruhengeri niho honyine twasanze bakoze ibinyuranyije n’amabwiriza. Twasanze abantu begeranye cyane ku buryo byashyira mu kaga abakirisitu bari baje mu misa.”

ACP Rugwizangoga yakomeje avuga ko abakecuru n’abasaza bari muri shapeli bari begeranye cyane. Ni mugihe abandi bakirisitu bari muri Katederali nabo batari bubahirije intera yagenwe hagati y’umuntu n’undi kuko intebe isanzwe yicarwaho n’abantu 4 kuri ubu igomba kwicarwaho n’abantu 2 gusa ariko ntabwo byari byubahirijwe.

Ishami ry’umuryango w’abibumbye ryita ku buzima (OMS) rivuga ko akenshi abantu bakuze cyane bibasirwa n’icyorezo cya COVID-19. By’umwihariko abarengeje imyaka 60 y’amavuko cyangwa se abafite ibibazo by’ubuzima nk’ubuhumekero, umutima, diyabete n’izindi.

Abapadiri barenze ku mabwiriza yo kurwanya COVID-19 bahanwe hakurikijwe amabwiriza ahana abarenze ku mabwiriza yo kurwanya COVID-19.

ACP Rugwizangoga yavuze ko Polisi y’u Rwanda ishinzwe kugenzura ko amabwiriza yubahirizwa.

Yagize ati “Icyo dushinzwe nka Polisi ni ukugenzura ko amabwiriza yubahirizwa  uko yatanzwe. Kandi tuzakomeza kugenzura neza ko amategeko yubahirizwa uko yatanzwe, twanavuganye n’izindi nzego bireba kuburyo ikindi cyemezo cyafatwa gihite cyubahirizwa”

ACP Rugwizangoga yakomeje yibutsa abagize amadini n’amatorero by’umwihariko abahawe uburenganzira bwo gusubukura serivisi ko bagomba kubahiriza amabwiriza yatanzwe n’inzego zibifitiye ububasha kandi bakagira uruhare mu gukumira ikwirakwira rya COVID-19.

SRC:RNP

Related posts

Hari ibyo abaturage basanga bikwiye kunozwa mu mushinga w’itegeko ry’ubutaka

Ndahiriwe Jean Bosco

Rwanda: Bamwe mu Bakristo bavuga ko ‘Imana’ yababujije kwikingiza Covid-19

Emma-Marie

Abavogereye inyubako y’Urukiko rw’Ibanze bari mu maboko ya RIB

Emma-Marie

Leave a Comment

Skip to toolbar