Mu bihugu 10 byihariye hafi 80% by’ibipimo bimaze gufatwa harimo U Rwanda, Afurika y’epfo, Maroc, Ghana, Misiri, Ethiopia, Uganda, Ibirwa bya Maurice, Kenya na Nigeria.
Hari itandukaniro rigiye ririho ku kigero cy’ibipimo, aho Afurika y’epfo ifata byinshi cyane naho Nigeria igafata bicye muri rusange, nkuko bitangazwa na ‘Our World in Data’, umushinga wo mu Bwongereza ukusanya amakuru ajyanye na Covid-19.
Ku itariki ya 4 y’uku kwezi kwa karindwi, Afurika y’epfo yafashe ibipimo birenga gato 30 kuri buri bantu 1,000, ugereranyije n’abantu 72 bapimwe mu Bwongereza na 105 bapimwe muri Leta Zunze Ubumwe z’Amerika kuri abo baturage 1,000.
Nigeria ipima abantu 0,7 kuri buri bantu 1,000, Ghana igapima 10 naho Kenya igapima 3.
Birakwiye kuvuga ko ku bihugu bimwe by’Afurika, bidashoboka kumenya mu buryo nyabwo ibiri kuhabera kubera ko nta mibare ihari cyangwa ihari ikaba ituzuye.
Chiedo Nwankwor, wigisha ibijyanye n’Afurika kuri Kaminuza ya Johns Hopkins muri Amerika, agira ati: “Imibare tugomba kuyigiraho amakenga”.
Muri Tanzania, Perezida John Magufuli yavuze ko adashira amakenga ukuri kw’ibipimo bya coronavirus byo muri ‘laboratoire’ y’igihugu.
Magufuli yanemereye igice gito gusa cy’imibare y’ubwandu n’ibipimo bifatwa gutangazwa ku mugaragaro.
Muri Guinée équatoriale, leta yagiranye ibibazo n’uhagarariye OMS imushinja gutubura imibare y’abanduye Covid-19. Mu gihe runaka, iki gihugu cyanze gutangaza imibare, ariko ubu noneho cyatangiye kongera kuyitangaza.
No muri leta ya Kano mu majyaruguru ya Nigeria, mu mpera y’ukwezi kwa kane hatangajwe ubwiyongere budasanzwe bw’impfu ubwo abantu bagera hafi ku 1,000 bapfaga, ariko na n’ubu leta ntiremeza umubare w’abazize Covid-19 muri abo.
Ieta y’u Rwanda mu rugamba rwo guhangana na Covid-19
Ingamba zitandukanye zashyizweho na Guverinoma y’u Rwanda zo kwirinda no gupima abantu benshi Covid-19, zatumye rushyirwa mu bihugu 10 biyipima cyane.
Tariki ya 2 Nyakanga 2020 ku mihanda itatu iri mu ikoreshwa n’abantu benshi mu mujyi wa Kigali , abakozi bo mu Kigo cy’Ubuzima ‘RBC’ bari bazindukiye mu gikorwa gufata ibipimo bya coronavirus ku bantu batandukanye bayinyuraho.
Icyo gihe, RBC yavuze ko icyari kigamijwe ar’ugusesengura uko icyorezo cya Covid-19 gihagaze mu Mujyi wa Kigali.
Tariki ya 7 Nyakanga 2020, Minisiteri y’Ubuzima yatangaza ko kuri uyu wa Kabiri tariki 07 Nyakanga 2020 mu Rwanda habonetse abarwayi bashya minongo itanu n’icyenda (59) ba COVID-19. Abo barwayi 59 babonetse mu bipimo 2,871, abamaze kuboneka mu Rwanda banduye icyo cyorezo bose hamwe baba 1,172.
Iriba.news@gmail.com
