Ubushyamirane hagati y’Amerika n’Ubushinwa bwigaragaje mu nama rusange ngaruka mwaka y’umuryango w’abibumbye (ONU/UN) ibera i New York, Perezida Donald Trump ashinja ubushinwa gukwirakwiza coronavirus ku isi.
Yasabye ko Ubushinwa “buryozwa” iki cyorezo.
Mu ijambo rye, Perezida Xi Jinping w’Ubushinwa yavuze ko igihugu cye “nta bushake gifite bwo kujya mu ntambara y’ubutita n’igihugu icyo ari cyo cyose”.
BBC yatangaje ko umubano hagati y’ibi bihugu bya mbere mu bukungu ku isi Amerika ku mwanya wa mbere n’Ubushinwa ku wa kabiri uracumbagira mu nzego zitandukanye.
Iyi nama ya ONU ibera i New York, ahanini iri kuba mu buryo bw’ikoranabuhanga ry’iyakure kubera iki cyorezo cya coronavirus, abategetsi bakavuga amagambo babanje kwifata mbere y’igihe.
Ubu buryo bushya iyi nama iri gukorwamo bwatumye udushya muri politike ubundi twajyaga twigaragaza mu bategetsi bamwe tutaboneka.
Buri gihugu gihagarariwe n’intumwa imwe, ndetse hari umwanya muto wo gutuma igihugu kimwe cyavuguruza ibyo ikindi kivuze.
Ariko nkuko akenshi abigenza mu magambo ageza ku nama rusange ya ONU, Perezida Trump yakoresheje uyu mwanya w’ijambo mu kugaragaza ibyo yagezeho no kwibasira uwo batavuga rumwe.
Ubushinwa ‘bwanduje isi’
Perezida Trump yagize ati: “Tugomba kubiryoza igihugu cyaterereje isi iki cyorezo – Ubushinwa”.
Yongeyeho ati: “Mu minsi ya mbere y’iyi virusi, Ubushinwa bwahagaritse ingendo imbere mu gihugu, mu gihe bwakomeje kwemerera ingendo z’indege kuva mu Bushinwa zanduza isi”.
“Ubushinwa bwamaganye gahunda yanjye yo kubuza ingendo ziva mu gihugu cyabo, no mu gihe bo bari bahagaritse ingendo imbere mu gihugu banafungiranye abaturage mu ngo zabo”.
Perezida Trump asanzwe na we anengwa bikomeye ku buryo yitwara mu guhangana na coronavirus mu gihugu cye, muri iki gihe Amerika yitegura amatora yo mu kwezi kwa cumi na kumwe.
Akenshi yagiye ashinja Ubushinwa guhishira amakuru ajyanye n’iyi virusi, avuga ko Ubushinwa bwari kuba bwararinze ko habaho ikwirakwira ryayo ku isi.
Ubushinwa buvuga ko ibyo birego ari ukurangaza kudafite aho gushingiye.
Muri Amerika coronavirus ubu imaze kwica abantu barenga 200,000 bose hamwe – ba mbere benshi ku isi – kandi Perezida Trump akenshi yagiye ahinyura ubukana bw’iyi ndwara.
Ubushyamirane buri ku kigero cyo hejuru hagati y’Amerika n’Ubushinwa ku bibazo bitandukanye birimo nk’ubucuruzi, ikoranabuhanga, Hong Kong n’uburyo Ubushinwa bufata ba nyamucye b’abayisilamu bo mu ntara ya Xinjiang.
