Image default
Mu mahanga

Sudani y’Epfo: Indege itwaye imishahara yahiye irakongoka

Indege nto itwaye amafaranga y’ishami ry’umuryango w’abibumbye ryita ku biribwa (PAM/WFP) yakoreye impanuka hafi y’umurwa mukuru Juba, yica abantu umunani mu bantu icyenda bari bariyirimo, nkuko abategetsi babivuga.

Bane muri abo bapfiriye muri iyo mpanuka yabaye mu gitondo cy’ejo ku wa gatandatu, ni Abanya-Sudani y’epfo, babiri ni abo muri Tajikistan naho abandi babiri ni abo muri Ukraine, nkuko byatangajwe na Perezida Salva Kiir, mu butumwa bwo kwihanganisha imiryango yabo.

Umwe wayirokotse ari kuvurirwa mu bitaro.Perezida Kiir yanditse ati: “Twese turababaye cyane kandi dufite agahinda kenshi mu mwanya w’imiryango yaburiye abayo muri iyi mpanuka”.

BBC yatangaje ko iyo mpanuka yabaye hashize akanya gato iyo ndege ihagurutse ku kibuga mpuzamahanga cy’i Juba.

Iyi indege yo mu bwoko bwa Antonov 36, yari yahawe akazi na banki ya Opportunity Bank ko gutwara imishahara y’abakozi ba PAM bakorera mu mujyi wa Wau – umujyi mukuru wa leta ya Bahr El-Ghazal iri mu burengerazuba bw’igihugu.

Madut Biar Yel, Minisitiri wo gutwara abantu n’ibintu wa Sudani y’epfo, yabwiye umunyamakuru wa BBC Nichola Mandil uri i Juba ati:

“Nabwiwe ko umubare [w’ayo yari itwaye] ari amadolari 35,000 y’Amerika [arenga miliyoni 33 mu mafaranga y’u Rwanda]”.

“Aya ni amafaranga yapfuye ubusa kuko indege yakoze impanuka igashya igahinduka ivu”.

Yongeyeho ko hashyizweho akanama ko gukora iperereza ku cyateye iyo mpanuka.

Iriba.news@gmail.com

 

Related posts

Uganda: Uganda: Impunzi ziri kwiyahura kubera COVID-19

Emma-Marie

U Burusiya bwakije umuriro kuri Ukraine mu buryo budasanzwe

Emma-Marie

Maroc: Umwana wapfuye nyuma yo kumara iminsi mu mwobo yashenguye imitima ya benshi

Emma-Marie
Skip to toolbar